“புது அரசுக்கு 10 நாள் கூட ஆகல… !அதுக்குள்ள சட்டம் ஒழுங்கு கெட்டுடுச்சா…!”தனிச்சையாக செயல்படும் காவல்துறை…!புதிய அரசு வந்தும் மாறாத அவலம்…!விருதுநகர் அதிகாரிகளுக்கு அமைச்சர் கொடுத்த வார்னிங்!…”

விருதுநகர் மாவட்டம் ஸ்ரீவில்லிபுத்தூரில் நடைபெற்ற ‘ஐந்தினை மக்கள் கட்சி’யின் பொதுச்செயலாளர் தேவதாஸ் நினைவேந்தல் நிகழ்வில், நாடாளுமன்ற ஆய்வுத் குழு கூட்டத்தில் பங்கேற்கச் சென்ற விசிக தலைவர் திருமாவளவனுக்குப் பதிலாக சமூக நலத்துறை அமைச்சர் வன்னியரசு கலந்துகொண்டார். அதன் பின்னர் செய்தியாளர்களைச் சந்தித்த அவர், அதிமுக எம்.எல்.ஏக்கள் தவெக-வில் (தமிழக வெற்றிக் கழகம்) இணைவது குறித்த கேள்விக்கு, ஒரு கட்சியின் மக்கள் பிரதிநிதிகளை விலைக்கு வாங்கித் தன் பக்கம் இழுப்பது நாகரிகமற்ற அரசியல் என்றும், இத்தகைய செயல்பாடுகளை விடுதலைச் சிறுத்தைகள் கட்சி ஒருபோதும் ஏற்றுக்கொள்ளாது என்றும் திட்டவட்டமாகக் கூறினார்.

அதிமுக, தவெக, விசிக உள்ளிட்ட அரசியல் கட்சிகளின் நகர்வுகள் மற்றும் தமிழகத்தின் சட்டம்-ஒழுங்கு நிலை குறித்து செய்தியாளர்கள் எழுப்பிய கேள்விகளுக்கு அமைச்சர் விரிவான விளக்கங்களை அளித்தார். தமிழகத்தில் புதிய அரசு பொறுப்பேற்று இன்னும் 10 நாட்கள்கூட முழுமையாக நிறைவடையாத நிலையில், சட்டம்-ஒழுங்கு சீர்கெட்டுவிட்டதாகக் கூறுவது திட்டமிடப்பட்ட அதீதக் குற்றச்சாட்டு என்று மறுத்தார். ஏடிஜிபி, டிஜிபி உள்ளிட்ட உயர் காவல்துறை அதிகாரிகளின் நியமனங்கள் மற்றும் நிர்வாகக் கட்டமைப்பு இப்போதுதான் உருவாக்கப்பட்டு வருவதாகவும், காவல்துறை தன்னிச்சையாகச் செயல்படுவதைத் தடுத்து இந்த அரசு சட்டம்-ஒழுங்கைச் சீராக நடத்தும் என்றும், பெரும்பான்மை மக்களால் தேர்ந்தெடுக்கப்பட்ட இந்த அரசில் தங்களுக்கும் பொறுப்பு உள்ளதாக அவர் குறிப்பிட்டார்.

மேலும், சூலூர் பாலியல் வழக்கு விவகாரத்தில் செய்தியாளர் சந்திப்பின் போது காவல்துறை அதிகாரிகள் சிரித்தது குறித்து எழுந்த விமர்சனங்களுக்கு அவர் கண்டனம் தெரிவித்தார். செய்தியாளர் சந்திப்பு தொடங்குவதற்கு முன்பாக அவர்கள் தங்களுக்குள் இயல்பான ஒரு விஷயத்தைப் பேசிக் கொண்டிருந்தபோது எடுக்கப்பட்ட காட்சியை ஊடகங்களும் சமூக ஊடகங்களும் தேவையின்றிப் பெரிதாக்குவதாகக் கூறினார். “காவல்துறை அதிகாரிகள் என்றால் எப்போதுமே முறைத்துக் கொண்டே இருக்க வேண்டுமா? அவர்கள் சிரிக்கவே கூடாதா?” என்று கேள்வி எழுப்பிய அவர், கொலை செய்யப்பட்ட ஆகாஷ் குடும்பத்தினரைத் தலைமைச் செயலகத்திற்கு வரவழைத்து, அவர்களுக்கான நீதியைப் பெற்றுத்தர அரசு அனைத்து முன்முயற்சிகளையும் எடுக்கும் என்று உறுதியளித்தார்.

இறுதியாக, சிவகாசி மற்றும் விருதுநகர் மாவட்டப் பகுதிகளில் தொடர்ந்து ஏற்படும் பட்டாசு விபத்துகள் மற்றும் தொழிலாளர்களின் வாழ்வாதாரம் குறித்து அமைச்சர் கவலை தெரிவித்தார். சுமார் 10 லட்சம் மக்களின் வாழ்வாதாரமாக விளங்கும் இத்தொழிலில், பெரும் முதலாளிகளை விட்டுவிட்டு எளிய மற்றும் தலித் மக்களைக் குறிவைத்து அதிகாரிகள் அச்சுறுத்துவதாகவும், பிளாக்மெயில் செய்வதாகவும் வந்த புகார்கள் குறித்து மாவட்ட ஆட்சியரிடம் பேச உள்ளதாகக் கூறினார். விபத்துகளற்ற முறையான தொழிலாக இதை மாற்றுவதற்கும், சிறு தொழிற்சாலைகளில் இருப்பவர்கள் அச்சமின்றிச் சட்டப்பூர்வமாகத் தொழில் நடத்துவதற்கும் சம்பந்தப்பட்ட அமைச்சருடன் இணைந்து உரிய நடவடிக்கை எடுக்கப்படும் என்றும் வன்னியரசு உறுதியளித்தார்.