“எங்க ஆளுக்கே ஆப்பா..?” காலில் கேபிள் சிக்கியதும் சார்ஜிங் ஸ்டேஷனை ஒரே தள்ளாக தள்ளிய யானை..! வைரல் வீடியோவை பார்த்து வியக்கும் நெட்டிசன்கள்..!!

சீனாவின் யுன்னான் மாகாணத்தில் உள்ள மின்சார வாகன சார்ஜிங் நிலையத்தை காட்டு யானை ஒன்று தள்ளிவிட்டு சேதப்படுத்திய சம்பவம் சமூக வலைதளங்களில் வைரலாகி வருகிறது. ஆகஸ்ட் 6 அன்று மாலையில் காட்டு யானைகள் கூட்டம் ஒன்று வீதியில் நடந்து சென்று கொண்டிருந்தபோது, சாலையோரத்தில் இருந்த சார்ஜிங் நிலையத்தின் கேபிள் ஒரு யானையின் காலில் சிக்கிக் கொண்டது. உடனே மற்றொரு யானை முன்வந்து, அந்த சார்ஜிங் சாதனத்தைத் தள்ளி கீழே தள்ளியது.

இந்த அசாதாரணமான சம்பவம் இணையத்தில் பெரும் விவாதத்தை ஏற்படுத்தியுள்ளதுடன், பார்வையாளர்கள் பலரும் இதற்குப் பல்வேறு கருத்துகளைத் தெரிவித்து வருகின்றனர். யானை தனது கூட்டத்தைச் சேர்ந்த சக யானையைப் பாதுகாப்பதற்காகவே இவ்வாறு செய்தது என்று ஒரு பயனர் கருத்து தெரிவித்துள்ளார். “யானைகள் மிகுந்த கூர்மையான அறிவுத்திறன் கொண்ட விலங்குகள்” என்று சிலர் சுட்டிக்காட்டியுள்ளனர். மேலும், இது கோபத்தால் செய்யப்பட்ட செயல் அல்ல என்றும், அந்தச் சாதனத்தை ஆராய்ந்து பார்க்கும்போது அது நேராக நிற்க முடியாமல் சரிந்து விழுந்தது என்றும் வேறு சிலர் கருதுகின்றனர்.

யானை பாதுகாப்பிற்காகச் செய்ததா, புதிய பொருளைப் பற்றிய ஆர்வத்தால் ஆராய்ந்ததா அல்லது வழியிலிருந்த தடங்கலுக்கு எதிர்வினை ஆற்றியதா எதுவாக இருந்தாலும், யுன்னான் காட்டு யானைகளின் சுவாரசியமான நடத்தையை இந்த நிகழ்வு மீண்டும் உலகிற்கு வெளிப்படுத்தியுள்ளது. மேலும், சிலர் யுன்னானில் உள்ள சிசுவாங்பான்னா யானைகள் சரணாலயத்திற்குச் சென்ற தங்களின் பழைய நினைவுகளைப் பகிர்ந்து கொண்டு, யுன்னான் யானைகளின் இந்த வித்தியாசமான செயலை வியந்து பாராட்டி வருகின்றனர்.