“யாராவது காப்பாத்துங்க..! அலறித் துடித்த பெண்…” வாக்கிங் சென்ற B.Tech மாணவியை கொடூரமாகக் கடித்துக் குதறிய ஜெர்மன் ஷெப்பர்ட்.. நடுரோட்டில் நடந்த பகீர் சம்பவம்..!!

ஹரியானா மாநிலம் ஃபரிதாபாத்தில் செக்டர்-37 பகுதியில் அமைந்துள்ள அசோகா என்கிளேவ் பார்ட்-2 பகுதியில், பிடெக் படித்து வரும் மாணவி ஒருவர் தனது போமேரியன் நாயை நடைபயிற்சிக்காக வெளியே அழைத்துச் சென்றபோது இச்சம்பவம் நடந்துள்ளது. அப்போது அவ்வழியாக வந்த பக்கத்து வீட்டுக்காரருக்குச் சொந்தமான ஜெர்மன் ஷெப்பர்ட் நாய் எந்தவிதக் கட்டுப்பாடும் இன்றித் திறந்துவிடப்பட்டிருந்தது. அந்த நாய் திடீரென மாணவியை நோக்கி ஓடிவந்து தாக்கியது.

தாக்குதலில் இருந்து தப்பிக்க அந்த மாணவி தனது நாயைக் கையில் தூக்கிப் பாதுகாத்துக் கொள்ள முயன்றார்; இருப்பினும், அந்த ஆக்ரோஷமான ஜெர்மன் ஷெப்பர்ட் நாய் அவரது வலது கை மற்றும் இடுப்புப் பகுதியில் கடித்துக் குதறியது. வலியால் அவர் அலறித் துடித்ததைத் தொடர்ந்து, சிறிது நேரத்திற்குப் பிறகு நாயின் உரிமையாளரான பெண் ஓடிவந்து அதனை விலக்கிப் பிடித்தார். இதன் பின் காயமடைந்த மாணவி உடனடியாக அம்ரிதா மருத்துவமனைக்கு அழைத்துச் செல்லப்பட்டு, அங்கு முதலுதவியும் ஆண்டி-ரேபிஸ் தடுப்பூசியும் செலுத்தப்பட்டு வீடு திரும்பினார்.

இந்தச் சம்பவம் குறித்து பாதிக்கப்பட்ட மாணவி சாரிதா சர்மா காவல்துறையில் அளித்த புகாரின் அடிப்படையில், சாய் காஜா காவல் நிலைய காவல்துறையினர் நாயின் உரிமையாளர்களான சிக்கந்தர் சர்மா மற்றும் அவரது மனைவி சுஷ்மா சர்மா ஆகியோர் மீது வழக்குப்பதிவு செய்துள்ளனர். மேலும், விலங்குகளைப் பொறுப்பற்ற முறையில் பொது இடங்களுக்குத் திறந்துவிட்டதன் மூலமாக நிகழ்ந்த இந்த ஆபத்தான தாக்குதல் குறித்து காவல்துறையினர் தீவிரமாக விசாரணை மேற்கொண்டு வருகின்றனர்.