கொள்கை எல்லாம் காலி…!”பதவிக்காக விஜய் பின்னால் ஓடிய கூட்டணிக் கட்சிகள்! பொறுமை இழந்து திமுக போட்ட புதிய கணக்கு…!பாஜக கூட்டணிக்கு பச்சைக் கொடி காட்டுகிறதா திமுக…!

தமிழக சட்டமன்றத் தேர்தல் முடிவுகளுக்குப் பிந்தைய அரசியல் சூழல், ஆளும்கட்சியாக இருந்த திமுகவிற்குள் பெரும் உள்முக விவாதங்களைத் தூண்டியுள்ளது. குறிப்பாக, நீண்டகாலமாக பாஜக எதிர்ப்பு அரசியலைத் தனது முதன்மைக் கொள்கையாகக் கொண்டு செயல்பட்டு வந்த திமுகவிற்குள்ளேயே, தற்போது பாஜகவுடன் கூட்டணி அமைப்பது குறித்து மெல்லிய குரல்கள் ஒலிக்கத் தொடங்கியிருப்பது அரசியல் வட்டாரங்களில் அதிர்ச்சியை ஏற்படுத்தியுள்ளது. 2026 சட்டப்பேரவைத் தேர்தலில் திமுக எதிர்பார்த்த வெற்றியைப் பெறத் தவறியதும், அக்கட்சியின் முக்கியத் தலைவர்களே தோல்வியைத் தழுவியதும் இந்த புதிய சிந்தனைக்கு முக்கியக் காரணமாகக் கூறப்படுகிறது.

இந்தத் தேர்தல் தோல்வியைக் காட்டிலும், திமுகவுடன் பல ஆண்டுகளாகப் பயணித்த கூட்டணிக் கட்சிகளின் தற்போதைய செயல்பாடுகளே அக்கட்சி நிர்வாகிகளை அதிகம் காயப்படுத்தியுள்ளதாகத் தெரிகிறது. தேர்தல் முடிந்த கையோடு, “கொள்கைக் கூட்டணி” என்று மார்புதட்டிப் பேசிய காங்கிரஸ், விசிக போன்ற கட்சிகள், விஜய்யின் தமிழக வெற்றிக் கழகத்திற்கு ஆதரவு தெரிவிக்கத் தொடங்கியது திமுகவிற்குள் கடும் அதிருப்தியை ஏற்படுத்தியுள்ளது. முதலில் வெளியில் இருந்து ஆதரவு தருவதாகக் கூறிவிட்டு, பின்னர் கம்யூனிஸ்ட் தவிர மற்ற மூன்று கட்சிகளும் அமைச்சரவையில் இடம்பிடித்தது, தற்போதைய ஆட்சி மாற்றத்திற்குப் பின் பதவிக்காக அவர்கள் அணி மாறிவிட்டனர் என்ற மனக்கசப்பை திமுக மூத்த தலைவர்களிடம் உருவாக்கியுள்ளது.

மற்றொருபுறம், திமுகவின் பாரம்பரிய வாக்கு வங்கியான சிறுபான்மையினர் மற்றும் இளைஞர்களின் வாக்குகள் இந்தத் தேர்தலில் விஜய்யின் வருகையால் பெருமளவில் சிதறியுள்ளதாக திமுக தரப்பிலேயே கணிக்கப்படுகிறது. தேசிய அரசியலில் இனிமேலும் காங்கிரஸை மட்டுமே நம்பியிருப்பது புத்திசாலித்தனமா என்ற கேள்வியும் எழுந்துள்ளது. மத்தியில் மீண்டும் பாஜக ஆட்சியே தொடரும் சூழல் நிலவுவதால், தொடர்ந்து எதிர்ப்பு அரசியலை மட்டுமே நடத்திக் கொண்டிருப்பது கட்சிக்கு எந்தப் பலனையும் தராது என்றும், அரசியல் யதார்த்தத்தை உணர்ந்து புதிய கூட்டணி வியூகங்களை வகுக்க வேண்டும் என்றும் நடைமுறைவாத நிர்வாகிகள் தலைமைக்கு அழுத்தம் கொடுத்து வருகின்றனர்.

இருப்பினும், பாஜகவுடனான கூட்டணி என்ற பேச்சுக்கே திமுகவின் அடிமட்டத் தொண்டர்களும், தீவிரக் கொள்கைவாதிகளும் கடுமையான எதிர்ப்பைப் பதிவு செய்து வருகின்றனர். திராவிட இயக்கத்தின் அடிப்படை அடையாளமே பாஜக எதிர்ப்புதான் என்றும், அதை விட்டுக்கொடுத்தால் கட்சியின் தனித்தன்மை முற்றிலுமாக அழிந்துவிடும் என்றும் அவர்கள் வாதிடுகின்றனர். இவ்வாறு கொள்கை அரசியல், நடைமுறை அரசியல் என இரண்டு விதமான மனநிலைகளுக்கு இடையே திமுக தவித்து வரும் நிலையில், கட்சியின் உட்கட்டமைப்பு மற்றும் கூட்டணி விவகாரங்களை மறுபரிசீலனை செய்து வரும் திமுக தலைவர் மு.க.ஸ்டாலின் எடுக்கப்போகும் அடுத்தகட்ட முடிவே தமிழக அரசியலின் எதிர்காலத்தைத் தீர்மானிக்கும் என எதிர்பார்க்கப்படுகிறது.