மரத்தில் தொங்கிய உயிர்..! கனமழைக்கு நடுவே லோனாவாலா பள்ளத்தாக்கில் விழுந்த வாலிபர்..! பதறவைக்கும் பின்னணி..!!

மகாராஷ்டிர மாநிலம் லோனாவாலா பகுதியில் ட்ரெக்கிங் சென்ற இளைஞர் ஒருவர், எதிர்பாராதவிதமாக ஆழமான பள்ளத்தாக்கில் வழுக்கி விழுந்த நிலையில், அங்கிருந்த மரத்தின் கிளையில் சிக்கி நல்வாய்ப்பாக உயிர்தப்பியுள்ளார். புதன்கிழமை நடந்த இச்சம்பவத்தின் போது, மரத்தில் தவித்துக் கொண்டிருந்த அந்த இளைஞரை உள்ளூர்வாசிகளும் மீட்புக் குழுவினரும் பத்திரமாக மீட்டனர். இது தொடர்பான வீடியோ சமூக வலைதளங்களில் வைரலாகி வருகிறது. இருப்பினும், அந்த இளைஞரின் அடையாளம் மற்றும் சம்பவம் நடந்த துல்லியமான இடம் குறித்த அதிகாரப்பூர்வ தகவல்கள் இன்னும் உறுதி செய்யப்படவில்லை.

இந்தச் சம்பவம், பருவமழை காலத்தில் மலைப்பகுதிகளுக்குப் பயணம் செய்வதில் உள்ள ஆபத்தை மீண்டும் வெளிப்படுத்தியுள்ளது. லோனாவாலா மற்றும் அதைச் சுற்றியுள்ள மாவல் பகுதிகளில் தொடர்ச்சியாகக் கனமழை பெய்து வருவதால், மலைப்பாதைகளும் சரிவுகளும் மிகவும் வழுக்கும் தன்மையுடன் காணப்படுகின்றன. லோனாவாலா உள்ளிட்ட புனே மலைப்பகுதிகளுக்கு இந்திய வானிலை ஆய்வு மையம் ‘ஆரஞ்சு அலர்ட்’ விடுத்துள்ளதுடன், மணிக்கு 60 முதல் 70 கி.மீ வேகத்தில் பலத்த காற்றும், கனமழையும் பெய்யக்கூடும் என்றும், நிலச்சரிவு மற்றும் சாலை வழுக்கும் அபாயம் உள்ளதாகவும் எச்சரித்துள்ளது.

இதனைத் தொடர்ந்து முன்னெச்சரிக்கை நடவடிக்கையாக, புனே மாவட்ட நிர்வாகம் லோனாவாலா கிராமப்புறப் பகுதிகளில் ஆகஸ்ட் 31 ஆம் தேதி வரை பாரதிய நாகரிக் சுரக்ஷா சன்ஹிதா பிரிவு 163-ன் கீழ் தடை உத்தரவைப் பிறப்பித்துள்ளது. திடீர் வெள்ளப்பெருக்கு மற்றும் நிலச்சரிவு அபாயம் இருப்பதால், டைகர் பாயிண்ட், லோஹகாட் கோட்டை போன்ற பிரபல சுற்றுலாத் தலங்கள், நீர்வீழ்ச்சிகள் மற்றும் ஆபத்தான மலைப்பகுதிகளுக்குச் செல்வதைத் தவிர்க்குமாறு சுற்றுலாப் பயணிகளுக்கு அதிகாரிகள் அறிவுறுத்தியுள்ளனர்.