“அது எனக்குப் பெரிய கவுரவம்..” சர்ச்சையில் சிக்கிய என்விடியா சிஇஓ-வுக்கு எலான் மஸ்க் கொடுத்த சர்ப்ரைஸ் ஆஃபர்..!!

டெஸ்லா மற்றும் ஸ்பேஸ்எக்ஸ் நிறுவனங்களின் தலைமைச் செயலதிகாரியான எலான் மஸ்க், என்விடியா நிறுவனத்தின் தலைமைச் செயலதிகாரி ஜென்சன் ஹுவாங்கைக் தனது நிறுவனத்தில் பணியமர்த்துவது குறித்துப் பேசுகையில், “அது ஒரு பெரிய கவுரவம்” என்று தெரிவித்துள்ளார். சீனாவுக்காக உளவு பார்த்ததாகக் கூறப்படும் ஒரு பெண்ணுடன் அவருக்குத் தொடர்பு இருந்ததாக வெளிவந்த தகவல்களால், ஜென்சன் ஹுவாங்கின் எதிர்காலம் என்விடியா நிறுவனத்தில் தற்போது கேள்விக்குறியாகியுள்ளது. இந்நிலையில், மைக்ரோபிளாக்கிங் தளமான எக்ஸ்-ல் பயனர் ஒருவர், ஹுவாங்கின் தற்போதைய நிச்சயமற்ற சூழ்நிலையைக் குறிப்பிட்டு அவரைப் பணியில் அமர்த்துமாறு மஸ்க்கைக் கேட்டுக் கொண்டதற்கு அவர் உடனடியாக ஒப்புதல் தெரிவித்தார்.

என்விடியா நிறுவனத்தின் இணை நிறுவனருமான ஜென்சன் ஹுவாங் மீதான பாலியல் மற்றும் தகாத உறவு தொடர்பான புதிய குற்றச்சாட்டுகளைத் தொடர்ந்து, அவரைப் பதவியில் இருந்து நீக்க அந்த நிறுவனத்தின் நிர்வாகக் குழு தீவிரமாகத் தயாராகி வருவதாகத் தகவல்கள் வெளியாகியுள்ளன. இதுகுறித்த விவகாரங்களை ஆராய்வதற்காக நிறுவனத்தின் வாரியம் உடனடியாகக் கூட்டத்தை நடத்தத் திட்டமிட்டுள்ளதாக ‘வால் ஸ்ட்ரீட் ஜேர்னல்’ செய்தி வெளியிட்டுள்ளது. மேலும், ஹுவாங்குக்கும் என்டிடியா நிறுவனத்தின் சுகாதாரப் பிரிவு துணைத் தலைவர் கிம்பர்லி பவலுக்கும் இடையே மற்றொரு தகாத உறவு இருந்ததாகவும், அது தொடர்பான வீடியோ ஆதாரங்கள் இருப்பதாகவும் ‘தி நியூயார்க் டைம்ஸ்’ செய்தி வெளியிட்டுள்ளது.

ஏற்கனவே சிங்கப்பூரைச் சேர்ந்த டேட்டா சென்டர் நிறுவனத்தின் மூத்த அதிகாரியான ஆலிஸ் ஹுவாங்குடன் ஜென்சன் ஹுவாங்குக்கு இருந்த உறவு பகிரங்கப்படுத்தப்பட்ட நிலையில், தற்போது இந்த புதிய குற்றச்சாட்டுகள் எழுந்துள்ளன. கடந்த வசந்த காலத்தில் அமெரிக்க உளவுத்துறை வெளியிட்ட குறிப்பாணையில், ஆலிஸ் ஹுவாங் சீனாவின் மாநிலப் பாதுகாப்பு அமைச்சகத்தின் உளவு முகவராக இருக்கலாம் என்று கூறப்பட்டிருந்தது குறிப்பிடத்தக்கது. இதன் காரணமாக அமெரிக்காவில் தொழில்நுட்பத் துறையின் முன்னணி ஆளுமையாகத் திகழும் ஹுவாங்கின் பதவியும் எதிர்காலமும் தற்போது பெரும் நெருக்கடியில் சிக்கியுள்ளது.