“தையல் தைக்க தெரியுமா..?” பிரசவ அறையில் எடுத்த புகைப்படத்தை இன்ஸ்டாவில் போட்ட பெண் மருத்துவர்…கொதித்தெழுந்த நெட்டிசன்கள்..!!

முன்னதாக புதிதாகப் பிறந்த குழந்தையின் புகைப்படத்தைச் சமூக வலைதளத்தில் பதிவிட்டு விமர்சனத்திற்குள்ளான கொல்கத்தாவைச் சேர்ந்த ஒரு பெண் மருத்துவ ஹவுஸ் சர்ஜன், தற்போது மீண்டும் ஒரு புதிய சர்ச்சையில் சிக்கியுள்ளார். அவர் தனது இன்ஸ்டாகிராம் ஸ்டோரியில் பிரசவத்திற்குப் பிறகு நோயாளிக்குச் செய்யப்படும் ‘எபிசியோடமி’ அறுவை சிகிச்சை தொடர்பான புகைப்படத்தைப் பகிர்ந்ததாகக் கூறப்படுகிறது. நோயாளியின் அனுமதியின்றி இந்த புகைப்படத்தைப் பதிவிட்டதன் மூலம், நோயாளியின் தனியுரிமை மற்றும் மருத்துவ அறநெறிகளை அவர் மீறிவிட்டதாக இணையத்தில் கடுமையான எதிர்ப்பு கிளம்பியுள்ளது.

‘X’ தளத்தில் பயனர் ஒருவர் பகிர்ந்த ஸ்கிரீன்ஷாட்டில், அறுவை சிகிச்சை மேஜை, மருத்துவ உபகரணங்கள் மற்றும் பிரசவத்திற்குப் பிந்தைய செயல்முறை போன்றவை இடம்பெற்றிருந்தன. அந்தப் படத்தில் நோயாளியின் அந்தரங்கப் பகுதி மறைக்கப்பட்டிருந்தாலும், அதன்மேல் “தையல் தைக்கத் தெரியுமா?” என்ற வரிகள் எழுதப்பட்டிருந்தன. இதைப் பார்த்த நெட்டிசன்கள், ‘படத்தை பிளர் செய்திருந்தாலும் அசல் புகைப்படம் அவரது போனில் இருக்கும் என்றும், எந்த ஒரு நோயாளியும் இதுபோன்ற புகைப்படத்திற்குச் சம்மதிக்க மாட்டார்கள்’ என்றும் சுட்டிக்காட்டி, கவன ஈர்ப்பிற்காக நோயாளியின் கண்ணியத்தை விற்கக் கூடாது எனக் கடுமையாகக் கண்டித்துள்ளனர்.

சில பயனர்கள் ‘இதில் முகமோ நோயாளியின் விவரங்களோ தெரியவில்லை’ என அவருக்கு ஆதரவாகப் பேசினாலும், பெரும்பாலானோர் சமூக வலைதளப் புகழுக்காக மருத்துவர்கள் நோயாளிகளின் தனியுரிமையை மீறுவதைச் சகித்துக் கொள்ள முடியாது எனக் குரல் எழுப்பியுள்ளனர். மேலும், பிரசவ அறையிலிருந்து இதுபோன்ற புகைப்படங்களை எடுத்துப் பகிர்வது தொழில்முறை தர்மத்திற்கு எதிரானது என்பதால், அந்த ஹவுஸ் சர்ஜன் மீது நடவடிக்கை எடுக்க வேண்டும் என்றும், அவரது உரிமத்தை ரத்து செய்ய வேண்டும் என்றும் தேசிய மருத்துவ ஆணையத்தை ‘X’ தளத்தில் டேக் செய்து நெட்டிசன்கள் வலியுறுத்தியுள்ளனர்.