“இந்த பொளப்புக்கு தெருத்தெருவா பிச்சை எடுக்கலாம்” இதுலயுமா ஊழல்..? அரசு அதிகாரிகளுக்கு உயர் நீதிமன்றம் வைத்த டோஸ்..!!

சென்னை உயர் நீதிமன்ற மதுரைக் கிளை, சிவகங்கை ஆதிதிராவிடர் நல விடுதி மாணவர்களுக்கான நிதி மோசடி வழக்கில் அரசு அதிகாரிகளின் செயல்பாடுகள் குறித்து மிகவும் கடுமையான அதிருப்தியை வெளிப்படுத்தியுள்ளது. ஏழை மாணவர்களின் நலனுக்காக ஒதுக்கப்பட்ட உதவித் தொகையைச் சுரண்டி வாழும் அதிகாரிகளை நோக்கி, “மாணவர்களுக்கான பணத்தில் ஊழல் செய்வதற்குப் பதில் தெருத் தெருவாகப் பிச்சை எடுக்கலாம்; இப்படிப்பட்ட பிழைப்பு இந்த அதிகாரிகளுக்குத் தேவையா?” என்று நீதிபதிகள் பி. வேல்முருகன், கே.கே. ராமகிருஷ்ணன் ஆகியோர் அடங்கிய அமர்வு மிகவும் காட்டமாகக் கேள்வி எழுப்பியுள்ளது.

சிவகங்கை மாவட்டம் பாதிரக்குடியைச் சேர்ந்த சக்திவேல் என்பவர் தாக்கல் செய்த பொதுநல மனுவில், 2017 முதல் 2023 வரையிலான காலகட்டத்தில் ஆதிதிராவிடர் நல விடுதி மாணவர்களின் சோப்பு, எண்ணெய் போன்ற அத்தியாவசியத் தேவைகளுக்காக அரசு ஒதுக்கிய ₹2.35 கோடிக்கும் அதிகமான நிதி, மாணவர்களின் கணக்கில் செலுத்தப்படாமல் வட்டாட்சியர்கள் உள்ளிட்ட அதிகாரிகளால் மோசடி செய்யப்பட்டுள்ளதாகக் குறிப்பிட்டிருந்தார். இந்த முறைகேட்டில் தொடர்புடைய 8 வட்டாட்சியர்கள் மீது இதுவரை ஒழுங்கு நடவடிக்கை எடுக்கப்படாமல் அவர்களுக்குப் பதவி உயர்வும், ஒரு சிலருக்குப் பணி ஓய்வும் வழங்கப்பட்டுள்ளதால், தற்போதைய மாவட்ட குற்றப்பிரிவு விசாரணைக்கு முற்றுப்புள்ளி வைத்து வழக்கை சிபிசிஐடி (CBCID) விசாரணைக்கு மாற்ற வேண்டும் என்றும் மனுதாரர் கோரியிருந்தார்.

இந்த வழக்கின் விசாரணையின் போது, எத்தனை அரசுகள் மாறினாலும் அதிகாரிகளின் ஊழல் குணம் மாறவில்லை என்று சாடிய நீதிபதிகள், குற்றம் சாட்டப்பட்ட அதிகாரிகளைக் காப்பாற்றும் வகையில் அரசு தரப்பு வழக்கறிஞர்கள் நீதிமன்றத்தில் ஆஜராகிப் பேசுவதை ஒருபோதும் சகித்துக் கொள்ள முடியாது என எச்சரித்தனர். மேலும், நீதிமன்றத்தில் முறையான ஆவணங்கள் மற்றும் விளக்கங்களை அளிக்காமல் வெறும் அலுவலக உதவியாளர்களை அனுப்பி வைத்த துறை சார்ந்த அதிகாரிகளின் அலட்சியப் போக்கிற்கும் கண்டனம் தெரிவித்ததோடு, தவறு செய்த அரசு ஊழியர்கள் மீது எடுக்கப்பட்ட துறை ரீதியான ஒழுங்கு நடவடிக்கைகள் குறித்து விரிவான அறிக்கை தாக்கல் செய்ய தமிழ்நாடு அரசுக்கு உத்தரவிட்டு விசாரணையை ஒத்திவைத்தனர்