“உங்க பொண்ணு இனி என்னோட குழந்தை மாதிரி..” பயிற்சி வகுப்பிலிருந்து திரும்பிய சிறுமிக்கு நேர்ந்த கொடூரம்.. கதறி அழுத தாயைக் கட்டிப்பிடித்து ஆறுதல் சொன்ன முதல்வர்..!!

பீகார் மாநிலம் ஜமுயியில் சிறுமி ஒருவர் துன்புறுத்தப்பட்டுத் தாக்கப்பட்ட வழக்கில், குற்றவாளிகள் மீது 24 முதல் 48 மணி நேரத்திற்குள் அம்மாநில அரசு எடுத்த விரைவான நடவடிக்கையை அச்சிறுமியின் தாய் வெகுவாகப் பாராட்டியுள்ளார். பாட்னாவில் முதல்வர் சாம்ராட் சவுத்ரியைச் சந்தித்த பின்னர் பேசிய அவர், தனது மகளின் பாதுகாப்பு, கல்வி மற்றும் அனைத்து உதவிகளுக்கும் முதல்வர் உறுதியளித்ததாகத் தெரிவித்தார். மேலும், முதல்வர் சாம்ராட் சவுத்ரி “உங்கள் மகள் என் குழந்தையைப் போன்றவர்” என்று தங்களுக்கு நம்பிக்கையளித்ததாகவும், அரசின் இந்நடவடிக்கை தங்களுக்கு மிகுந்த மனநிறைவை அளிப்பதாகவும் சிறுமியின் தாய் கூறினார்.

இச்சம்பவம் குறித்து சிறுமியின் தாய் கூறுகையில், “சம்பவம் நடந்த 24-48 மணி நேரத்திற்குள் நடவடிக்கை எடுக்கப்பட்டு விட்டது. முதலில் 3 குற்றவாளிகள் கைது செய்யப்பட்டனர்; அதனைத் தொடர்ந்து முதன்மை குற்றவாளி பொலிஸாரின் துப்பாக்கிச் சூட்டுக்கு பின் பிடிக்கப்பட்டார். அரசு எடுத்த நடவடிக்கையில் எனக்கு முழு திருப்தி உள்ளது. என் மகளுக்கு நேர்ந்தது போல் வேறு எந்தப் பெண்ணுக்கும் நடக்கக் கூடாது. குற்றவாளிகளுக்குக் கடுமையான தண்டனை வழங்கப்பட வேண்டும்” என்று வலியுறுத்தினார்.

கடந்த செப்டம்பர் 19 அன்று 10-ஆம் வகுப்பு படிக்கும் சிறுமி பயிற்சி வகுப்பிலிருந்து திரும்பும்போது தடுத்து நிறுத்தப்பட்டுத் துன்புறுத்தப்பட்டார். இச்சம்பவத்தில் தொடர்புடைய முதன்மை குற்றவாளி நந்தன் யாதவ் மற்றும் அரே ராம் யாதவ் ஆகிய இருவரும் தப்பிச் செல்ல முயன்றபோது பொலிஸாரால் சுட்டுப் பிடிக்கப்பட்டனர். இந்த வழக்கில் இதுவரை 5 பேர் கைது செய்யப்பட்டுள்ளனர். மேலும், சிறுமியின் அடையாளத்தை வெளிப்படுத்தும் வகையில் இச்சம்பவத்தின் வீடியோவைப் பகிர்ந்த 120-க்கும் மேற்பட்ட சமூக வலைதளக் கணக்குகள் மீது போக்சோ மற்றும் தகவல் தொழில்நுட்பச் சட்டங்களின் கீழ் வழக்குப் பதிவு செய்யப்பட்டு, அந்த வீடியோக்கள் இணையத்திலிருந்து அகற்றப்பட்டு வருகின்றன.