“ஆண் குழந்தையின் அந்தரங்க உறுப்பில் முத்தமிடுவது” போக்சோ சட்டப்படி கடுமையான பாலியல் வன்கொடுமை.. கேரள உயர் நீதிமன்றம் அதிரடி தீர்ப்பு..!!

கேரள உயர் நீதிமன்றம் ஆண் குழந்தையின் அந்தரங்க உறுப்பைத் தொட்டு முத்தமிடும் செயல், போக்சோ சட்டத்தின் கீழ் வெறும் பாலியல் தொல்லை அல்ல, அது கடுமையான ஊடுருவல் பாலியல் வன்கொடுமை குற்றமே என்று அதிரடித் தீர்ப்பு வழங்கியுள்ளது. 14 வயது சிறுவனுக்கு நேர்ந்த இத்தகைய பாலியல் கொடுமைக்காக, குற்றவாளிக்கு விதிக்கப்பட்ட 20 ஆண்டு சிறைத் தண்டனையை உறுதி செய்து நீதிமன்றம் இந்த உத்தரவை பிறப்பித்துள்ளது.

தண்டனையை எதிர்த்து தாக்கல் செய்யப்பட்ட மேல்முறையீட்டு மனுவை விசாரித்த தனி நீதிபதி, போக்சோ சட்டப்பிரிவு 3 மற்றும் 4-ன் கீழ் இந்தச் செயல் மிகக் கடுமையான குற்றமாகவே கருதப்பட வேண்டும் என்று திட்டவட்டமாகத் தெரிவித்தார். குழந்தையின் உடல் உறுப்புக்குள் மற்றொரு உறுப்பையோ அல்லது பொருளையோ நுழைப்பது மட்டுமே ஊடுருவல் அல்ல என்றும், சட்டத்தின் நோக்கப்படி குழந்தையின் அந்தரங்க உறுப்பைத் தொட்டு முத்தமிடுவதும் இதில் அடங்கும் என்றும் நீதிபதி விளக்கியுள்ளார்.

குழந்தைகளுக்கு எதிரான பாலியல் குற்றங்களில் ஆண், பெண் என்ற பாகுபாடு கிடையாது என்பதை இந்தத் தீர்ப்பு மீண்டும் நிலைநிறுத்தியுள்ளது. இத்தகைய செயல்கள் குழந்தைகளின் மனநலத்தையும் உடல்நலத்தையும் கடுமையாகப் பாதிக்கும் என்பதால், சட்டத்தை மிகத் தீவிரமாகப் பயன்படுத்த வேண்டும் என்றும், பாதிக்கப்பட்ட குழந்தைகளுக்கு உரிய நீதி கிடைப்பதை நீதிமன்றங்கள் உறுதி செய்ய வேண்டும் என்றும் நீதிபதி தனது தீர்ப்பில் வலியுறுத்தியுள்ளார்.