“தோற்றாலும் அவர்கள் தான் ஹீரோக்கள்” நாடே திரண்டு வந்து கொடுத்த பிரம்மாண்ட வரவேற்பு… FIFA 2026-ல் உலகையே அதிரவைத்த கேப் வெர்டே..!!

மிகக் குறைந்த மக்கள் தொகையைக் கொண்ட சிறிய நாடான ‘கேப் வெர்டே’, ஃபிஃபா 2026 உலகக்கோப்பை கால்பந்து போட்டியில் உலகையே திரும்பிப் பார்க்க வைத்துள்ளது. உலகத் தரவரிசையில் 67-வது இடத்தில் இருந்த இந்த அணி, தங்களின் அபார ஆட்டத்தால் ஸ்பெயின் மற்றும் உருகுவே போன்ற கால்பந்தாட்ட உலகின் பெரும் ஜாம்பவான் அணிகளையே திணறடித்து போட்டியை டிரா செய்தது. இதன் மூலம், உலக வரைபடத்தில் தங்களது நாட்டை விளையாட்டு ரசிகர்கள் மத்தியில் ஒரு ட்ரெண்டிங் தலைப்பாக மாற்றியது.

அடுத்ததாக நடைபெற்ற உலகக் கோப்பையின் 32-வது சுற்று ஆட்டத்தில், பலம் வாய்ந்த அர்ஜென்டினா அணியிடம் 3-2 என்ற கோல் கணக்கில் கேப் வெர்டே அணி போராடி தோல்வியடைந்தது. இத்துடன் தங்களின் உலகக்கோப்பை கனவுப் பயணத்தை முடித்துக்கொண்டு ஞாயிற்றுக்கிழமை நாடு திரும்பிய வீரர்களை, அந்நாட்டு மக்கள் உண்மையான ஹீரோக்களாகக் கொண்டாடினர். தலைநகர் பிரையாவில் வீரர்கள் தரையிறங்கிய போது, ஆயிரக்கணக்கான ரசிகர்கள் கொடிகளுடன் திரண்டு வந்து உற்சாக வரவேற்பு அளித்தனர். மேலும், வீரர்கள் திறந்தவெளி டிரக்கில் கெப்ரா கனெலா கடற்கரைக்குச் சென்றபோது, வீதிகளின் இருபுறமும் மக்கள் வெள்ளமெனத் திரண்டு வாழ்த்தினர்.

ஜூலை 5-ம் தேதி கேப் வெர்டேயின் சுதந்திர தினம் என்பதால், வீரர்களின் இந்த வருகை அந்நாட்டு மக்களுக்கு இரட்டிப்பு மகிழ்ச்சியைத் தந்தது. “ஒப்ரிகாடோ! காபோ வெர்டே” என்ற வாசகங்கள் அடங்கிய மேடையில், அணியின் பயிற்சியாளர் புபிஸ்டா ரசிகர்களுடன் இணைந்து நடனமாடிக் கொண்டாடினார். சுமார் 5 லட்சம் மக்கள் தொகையைக் கொண்ட 10 தீவுகளின் தொகுப்பான இந்த நாடு, இந்த நூற்றாண்டின் தொடக்கம் வரை உலகக் கோப்பை தகுதிச் சுற்றில்கூட விளையாடியதில்லை. ஆனால், இந்த 2026 உலகக்கோப்பையில் தங்களின் அஞ்சாத ஆட்டத்தால் உலகெங்கிலும் உள்ள கோடிக்கணக்கான மக்களின் இதயங்களை வென்று, கால்பந்து வரலாற்றில் தனக்கென ஒரு நீங்கா இடத்தைப் பிடித்துள்ளது.