அடேங்கப்பா… என்ன மனுஷன்யா இவர்..! 8 முறை ரிஜெக்ட் ஆகியும் அசராத உழைப்பு… 59 வயதில் 9 வயசுல அரசு வேலை வாங்கிய மாஸ் காட்டிய நபர்..!!

உத்தரப் பிரதேச மாநிலம் பாக்பத் மாவட்டத்தைச் சேர்ந்த 59 வயதான விஜய் குமார் சர்மா என்பவருக்கு, 27 ஆண்டுகள் தொடர் முயற்சிக்குப் பிறகு அரசுப் பள்ளி ஆசிரியர் பணி கிடைத்துள்ளது. பாக்பத் மாவட்டம் பரோட் பகுதிக்கு அருகிலுள்ள பத்வாட் கிராமத்தைச் சேர்ந்த இவர், 1999-ஆம் ஆண்டிலிருந்து அரசு ஆசிரியர் பணிப் தேர்வுகளுக்காகத் தொடர்ந்து தயாராகி வந்துள்ளார். தற்போது இவருக்கு பக்கத்து மாவட்டமான ஷாம்லியில் உள்ள அரசு உதவிபெறும் மேல்நிலைப் பள்ளியில் TGT சமஸ்கிருத ஆசிரியராகப் பணி கிடைத்துள்ளது. கடந்த செப்டம்பர் 22 அன்று லக்னோவில் நடைபெற்ற நிகழ்ச்சியில் உத்தரப் பிரதேச முதல்வர் யோகி ஆதித்யநாத் இவருக்கு பணி நியமன ஆணையை வழங்கினார்.

இந்த வெற்றியை அடைய விஜய் குமார் சர்மா சந்தித்த தடைகளும் உழைப்பும் மிகப்பெரியவை. கடந்த 27 ஆண்டுகளில் இவர் 6 முறை TGT எழுத்துத் தேர்வையும், 4 முறை PGT எழுத்துத் தேர்வையும் தேர்ச்சி பெற்றுள்ளார். மேலும், சுமார் 8 முறை நேர்முகத் தேர்வுகளில் (Interview) பங்கேற்றும் இறுதித் தேர்வுப் பட்டியலில் இடம் பிடிக்க முடியாமல் போயுள்ளது. ஒவ்வொரு முறை தோல்வியைச் சந்திக்கும்போதும் மனம் தளராமல் மீண்டும் படிக்கத் தொடங்குவார். இம்முறை தேர்வு முறையில் நேர்முகத் தேர்வு இல்லாததால், இவரின் பல ஆண்டு கால காத்திருப்பிற்கு இறுதியாக வெற்றி கிடைத்துள்ளது.

அரசு வேலைக்காகத் தொடர்ந்து முயன்று வந்த அதே வேளையில், கடந்த 26 ஆண்டுகளாகத் தனியார் பள்ளிகளில் இந்தி மற்றும் சமஸ்கிருத ஆசிரியராகப் பணியாற்றி வந்தார். பகலில் மாணவர்களுக்குப் பாடம் கற்பித்துக் கொண்டே, ஓய்வு நேரங்களில் போட்டித் தேர்வுகளுக்குத் தயாராகி வந்துள்ளார். இவருடைய தந்தையும் ஒரு ஆசிரியராவார். மேலும், இவருடைய இரு மகன்கள் உத்தரப் பிரதேச காவல் துறையில் பணியாற்றி வரும் நிலையில், இவரது மூன்று மகள்களில் ஒருவரும் ஆசிரியர் பணி தேர்வுப் பட்டியலில் காத்திருப்போர் வரிசையில் உள்ளார். முயற்சி செய்யும் வரை இலக்கை அடைய வயது ஒரு தடையல்ல என்று நம்பும் இவர், 59 வயதில் அரசு ஆசிரியராகப் பொறுப்பேற்பதில் மிகுந்த பெருமிதம் கொள்கிறார்.