கடலுக்குள் கார் ஓட்டி போலீசிடம் சிக்கிய நபர்? இணையத்தை அதிரவைக்கும் வினோத அபராத ரசீதின் பின்னணி…!!

உத்தரப்பிரதேச மாநிலம் யமுனா விரைவுச்சாலையில் அனுமதிக்கப்பட்ட வேக வரம்பை விட வெறும் 1 கி.மீ. அதிகமாக வாகனத்தை இயக்கியதாகக் கூறி, அனுஜீத் சிவம் என்பவருக்கு நொய்டா போக்குவரத்து போலீசார் ரூ. 2,000 மின்னணு அபராதம் விதித்துள்ளனர். இந்தச் சம்பவம் தற்போது இணையத்தில் பெரும் விவாதத்தையும், சிரிப்பலையையும் ஏற்படுத்தியுள்ளது.

குறிப்பிட்ட அந்த அபராத ரசீதில், விதிமீறல் நடந்த இடமாகக் குறிப்பிடப்பட்டிருந்த ஜிபிஎஸ் தரவுகள் அட்லாண்டிக் பெருங்கடலின் நடுப்பகுதியைக் குறிக்கும் ‘0°N, 0°E’ என்ற ஆயத்தொலைவுகளைக் காட்டியுள்ளன. இதனால் நிலச் சாலையில் சென்ற காரை கடலில் ஓட்டியதாகப் பதிவான தொழில்நுட்பக் கோளாறைச் சுட்டிக்காட்டி வாகன ஓட்டி சமூக வலைதளங்களில் கேள்வி எழுப்பியுள்ளார்.

தொழில்நுட்பக் கோளாறு அல்லது ஜிபிஎஸ் சிக்னல் துண்டிக்கப்படும்போது ஏ.ஐ. கேமராக்களில் இதுபோன்று தவறான இடங்கள் பதிவாவதாக வல்லுநர்கள் தெரிவிக்கின்றனர். இந்த விவகாரம் வைரலானதைத் தொடர்ந்து, இது குறித்துப் புகாரளிக்க உரிய உதவி எண்களைத் தொடர்பு கொள்ளுமாறு போக்குவரத்து போலீசார் தரப்பில் அறிவுறுத்தப்பட்டுள்ளது.