“நாங்க பைத்தியம் இல்ல பாஸ்… பைக் லோன் கட்டுன பணத்தை அமுக்கிட்டாங்க..” அநியாயத்தைக் கண்டித்து காவல் நிலையத்துக்குள்ளேயே வழக்கறிஞர்கள் செய்த விசித்திரப் போராட்டம்..!!

உத்தரப் பிரதேச மாநிலம் பிரயாக்ராஜில், காவலத்துறையின் செயல்பாட்டிற்கு எதிர்ப்பு தெரிவித்து அலகாபாத் உயர் நீதிமன்ற வழக்கறிஞர்கள் சிவில் லைன்ஸ் காவல் நிலையத்தில் விசித்திரமான முறையில் போராட்டம் நடத்தினர். ஒரு மோசடி வழக்கில் குற்றவாளி மீது உரிய சட்டப் பிரிவுகளின் கீழ் FIR பதிவு செய்து கடுமையான நடவடிக்கை எடுக்கக் கோரி, வழக்கறிஞர்கள் தொடர்ந்து ஐந்து நாட்கள் காவல் நிலையத்திற்குள்ளேயே தர்ணாவில் ஈடுபட்டனர். இந்த போராட்டத்தின் போது, அவர்கள் சினிமா பாடல்களுக்கு நடனமாடியும், கஜல் மற்றும் கவிதை நிகழ்ச்சிகள் நடத்தியும் காவல் துறையினருக்கு எதிராகவும், தங்களது கோபத்தை வெளிப்படுத்தியும் வினோதமான முறையில் எதிர்ப்பைப் பதிவு செய்தனர்.

வழக்கறிஞர்கள் ஐந்து நாட்களாக காவல் நிலையத்திற்குள்ளேயே மெத்தைகள், பாய்கள் மற்றும் கொசுவலைகளை அமைத்துத் தங்கியதுடன், நாற்காலி, மேஜை மற்றும் ஒலிபெருக்கிகளையும் அங்கு அமைத்திருந்தனர். இந்த சர்ச்சை, அலகாபாத் உயர் நீதிமன்ற வழக்கறிஞர் பிரிஜேஷ் குமார் திவாரியின் பைக் கடனுக்காக செலுத்தப்பட்ட ரூ.63,400 தொகையில் நடந்த மோசடியால் தொடங்கியது. கன்ஹா மோட்டார்ஸ் நிறுவன ஊழியர் ஒருவர் சேவையகத்தில் பிரச்சனை என்று கூறி, அப்பணத்தை தன் சொந்தக் கணக்கில் மாற்றிக் கொண்டு போலி ரசீதை வழங்கி ஏமாற்றியுள்ளார். இது குறித்து ஏஜென்சியில் விசாரித்தபோது பணம் செலுத்தப்படவில்லை என்பது தெரியவந்தது. ஆனால், புகார் அளித்த பிறகும் காவல்துறை கடுமையான பிரிவுகளில் வழக்குப்பதிவு செய்யாமல் அலட்சியம் காட்டியதால் வழக்கறிஞர்கள் போராட்டத்தில் குதித்தனர்.

ஐந்து நாட்கள் தொடர்ந்த இந்த போராட்டத்தின் போது, உண்ணாவிரதத்தில் ஈடுபட்ட வழக்கறிஞர் பிரிஜேஷ் குமார் திவாரியின் உடல்நிலை மோசமடைந்ததை அடுத்து அவர் மருத்துவமனையில் அனுமதிக்கப்பட்டார். இதனால் காவல் துறை நிர்வாகத்திற்கு அழுத்தம் அதிகமானது. இறுதியில், செவ்வாய்க்கிழமை அன்று காவல் துறை அதிகாரிகள் குற்றவாளி மீது கடும் நடவடிக்கை எடுக்கப்படும் என்றும், விரைவில் அவர் கைது செய்யப்படுவார் என்றும் உறுதியளித்தனர். அதிகாரிகளின் இந்த உறுதிமொழியைத் தொடர்ந்து, வழக்கறிஞர்கள் தங்களது 5 நாள் விசித்திர போராட்டத்தை முடிவுக்குக் கொண்டுவந்தனர்.