ஆக்ராவில் கொடூரம்…! குரங்கை சூழ்ந்து கடித்துக் கொன்ற தெருநாய்கள்… வைரல் வீடியோவால் பொதுமக்கள் அச்சம்..!!

ஆக்ராவின் கமலா நகர் பகுதியில், தெருநாய்கள் கூட்டமாகச் சேர்ந்து குரங்கு ஒன்றை கொடூரமாகக் கடித்துக் கொன்ற சம்பவம் அப்பகுதி மக்களிடையே பெரும் அச்சத்தை ஏற்படுத்தியுள்ளது. வியாழக்கிழமை மாலையில் குடியிருப்புப் பகுதிக்குள் வந்த குரங்கை, சுமார் 6 முதல் 7 தெருநாய்கள் திடீரெனச் சூழ்ந்துகொண்டு அனைத்துப் பக்கங்களிலிருந்தும் கொடூரமாகத் தாக்கின.

நாய்களிடமிருந்து தப்பிக்க குரங்கு கடுமையாகப் போராடியபோதிலும், தெருநாய்கள் அதன் கழுத்து மற்றும் கால்களில் கடித்துத் தெருவெங்கும் இழுத்துச் சென்றன. இச்சம்பவத்தைப் பார்த்த பொதுமக்கள் பலர் அங்கிருந்தபோதிலும், நாய்களின் வன்முறைத் தன்மையைக் கண்டு அஞ்சியதால் குரங்கைக் காப்பாற்ற முன்வரவில்லை. மாறாக, அங்கிருந்த சிலர் இச்சம்பவத்தைத் தங்களது செல்போன்களில் படம்பிடித்தனர். இது தொடர்பான வீடியோ சமூக வலைதளங்களில் வெளியாகி வைரலாகி வருகிறது.

இப்பகுதியில் கடந்த சில மாதங்களாகத் தெருநாய்களின் எண்ணிக்கை கணிசமாக அதிகரித்துள்ளதாகவும், அவை வழிப்போக்கர்கள், குழந்தைகள், நடைப்பயிற்சி மேற்கொள்பவர்கள் மற்றும் முதியவர்களை அச்சுறுத்தி வருவதாகவும் பொதுமக்கள் கவலை தெரிவிக்கின்றனர். இந்த விவகாரத்திற்கு உடனடியாகத் தீர்வு காணாவிட்டால், விலங்குகளுக்கு மட்டுமல்லாமல் மனிதர்களின் பாதுகாப்புக்கும் பெரும் அச்சுறுத்தல் ஏற்படும் என அஞ்சுகின்றனர். இதனால் தெருநாய்களுக்குத் தடுப்பூசி செலுத்துதல், கருத்தடை முகாமை நடத்துதல் மற்றும் நகராட்சி நிர்வாகத்தின் மூலம் உரிய நடவடிக்கைகளை விரைந்து எடுக்க வேண்டும் எனப் பகுதி மக்கள் கோரிக்கை விடுத்துள்ளனர்.