தப்பை தட்டிக்கேட்டா தேசத்துரோகியா? கைக்கூலியா.? பாஜகவை விட்டு விலகி பல மாசமாச்சு.. அடுக்கடுக்கான கேள்விகளால் டெல்லியை உலுக்கிய அண்ணாமலை..!!

முன்னாள் பாஜக மாநிலத் தலைவரும் ‘வீ தி லீடர்ஸ்’ அமைப்பின் தலைவருமான அண்ணாமலை, ஜனநாயக நாட்டில் நடைபெறும் தவறுகளைக் கேள்வி கேட்டால் ‘தேசத்துரோகி’ மற்றும் ‘அந்நிய கைக்கூலி’ என முத்திரை குத்தும் போக்கு சலிப்படையச் செய்வதாகக் கூறி பாஜகவிற்கு 5 அடுக்கடுக்கான கேள்விகளை முன்வைத்துள்ளார். தான் 2026 ஜூன் 5-ஆம் தேதியே பாஜகவிலிருந்து விலகிவிட்டதை நினைவூட்டியுள்ள அவர், நீட் தேர்வுக்கு எதிரான போராட்டங்கள் மற்றும் டெல்லியில் சி.ஜே.பி அமைப்பின் போராட்டக்காரர்கள் கைது செய்யப்பட்ட விதம் குறித்துத் தான் எழுப்பிய நியாயமான கேள்விகளுக்காகத் தன் மீது மீண்டும் தாக்குதல்கள் தொடுக்கப்படுவதாகத் தெரிவித்துள்ளார். சி.ஜே.பி அமைப்பின் அணுகுமுறைகளில் தனக்கு உடன்பாடு இல்லை என்றாலும், ஒரு ஜனநாயக நாட்டில் அவர்களுக்குப் போராட உரிமை உண்டு என அண்ணாமலை வாதிட்டுள்ளார்.

மத்திய உள்துறை அமைச்சகத்தைக் குறிவைத்து அண்ணாமலை எழுப்பியுள்ள கேள்விகளில், சி.ஜே.பி அமைப்பு அனுமதி கோரிய பிறகு ஜந்தர் மந்தர் போராட்டத் தளம் எவ்வாறு நீக்கப்பட்டது என்றும், டெல்லி காவல்துறை உதவி ஆணையருக்கு (ACP) சிறப்பு நிர்வாக நீதிபதி அதிகாரம் வழங்கி ஒருவரைத் தடுப்புக் காவலில் வைக்கும் ஒருதலைப்பட்சமான நடைமுறை இன்னும் எவ்வளவு காலம் தொடரும் என்றும் கேட்டுள்ளார். மேலும், டெல்லி காவல்துறையே புகாரளிப்பவராகவும் இருக்கும் சூழலில், அதே துறையைச் சேர்ந்த ACP நீதிபதியாக இருந்தால் தீர்ப்பு எப்படி நடுநிலையாக இருக்கும் என்ற கேள்வியையும் அவர் முன்வைத்துள்ளார். கைதானவர்களின் பிணை விசாரணையின்போது சிறப்பு நிர்வாக நீதிபதி வேண்டுமென்றே தாமதமாக வந்து விசாரணையிலிருந்து விலகியது ஏன், பிணை உத்தரவாதங்கள் ஏன் நிராகரிக்கப்பட்டன மற்றும் நீட் போராட்டத்தின் போது பெல்லட் துப்பாக்கிகள் பயன்படுத்தப்பட்டது ஏன் போன்ற கேள்விகளை மத்திய அரசுக்கு எதிராக அவர் அடுக்கிக் கேட்டுள்ளார்.

இறுதியாக, டெல்லி உயர்நீதிமன்றத் தலையீட்டிற்குப் பிறகு சி.ஜே.பி நிர்வாகிகள் விடுவிக்கப்பட்டதைச் சுட்டிக்காட்டிய அண்ணாமலை, தசரா கொண்டாட்டத்தின் போது பாஜக சட்டமன்ற உறுப்பினர் அசோக் கோயல் முன்னிலையில் கரப்பான்பூச்சி உருவப்பொம்மை எரிக்கப்பட்டதன் மூலம் அந்த அமைப்புக்குத் தேசிய அளவில் இலவச விளம்பரம் தேடித்தரப்பட்டுள்ளதாகக் குற்றம் சாட்டியுள்ளார். இதன் மூலம் எதிர்க்கட்சிகளின் வாக்குகளைப் பிரிக்க சி.ஜே.பி அமைப்பை ஒரு பெரிய அரசியல் சக்தியாகக் காட்ட பாஜகவே விரும்புகிறதா என்று அவர் வினவியுள்ளார். 12 ஆண்டுகளுக்கும் மேலாக மத்தியில் ஆட்சியில் இருந்தும், தன்னைத் தொடர்ந்து முக்கியத்துவப்படுத்துவதற்காகத் தங்களுக்குள்ளேயே எப்போதும் ஒரு புதிய எதிரியை பாஜக உருவாக்கிக் கொண்டிருக்கிறது என்றும், ஒவ்வொரு போராட்டத்தையும் ‘தேசவிரோதச் செயல்’ எனச் சித்தரிப்பது வருத்தத்திற்குரியது என்றும் அண்ணாமலை மிகக் காரசாரமாகத் தனது பதிவை முடித்துள்ளார்.