குறைந்த விலைக்கு பருப்பு வாங்கிய TNCSC இயக்குநர் ஏன் திடீரென மாற்றப்பட்டார்..? விலை உயர்ந்தால் ஊழல் என ஏற்பீர்களா..? தவெக அரசுக்கு சக்கரபாணி சவால்…!!

தமிழக உணவு மற்றும் நுகர்வோர் பாதுகாப்புத் துறை முன்னாள் அமைச்சர் ஆர். சக்கரபாணி, தவெக ஆட்சியில் ரேஷன் விநியோகத்திற்கான துவரம் பருப்பு மிகக் குறைந்த விலைக்குக் கொள்முதல் செய்யப்பட்டதாக வெளியான செய்திக்குக் கடுமையான கண்டனத்தை எக்ஸ் தளம் வாயிலாகப் பதிவு செய்துள்ளார். தற்போதைய தவெக அரசு ஜூலை முதல் செப்டம்பர் வரையிலான 3 மாதங்களில், கிலோ ₹77.89 என்ற விலையில் 60,000 டன் துவரம் பருப்பைக் கொள்முதல் செய்து, அரசுப் பொக்கிஷத்திற்கு ₹187.56 கோடி சேமித்துள்ளதாக ஊடகங்களில் செய்திகள் வெளியாகியிருந்தன. இது முந்தைய திமுக ஆட்சியின் கொள்முதல் விலையான ₹109.15 ஐ விட ₹31 குறைவு என்றும் கூறப்பட்டிருந்தது.

இந்தச் செய்திக்கு எதிர்ப்புத் தெரிவித்துள்ள சக்கரபாணி, தவெக அரசின் இந்தக் கொள்முதல் விலை உண்மை என்றால், மிகக் குறைந்த விலையில் திறம்படப் பருப்பு வாங்கிய தமிழ்நாடு நுகர்பொருள் வாணிபக் கழகத்தின் இயக்குநர் ஏன் உடனடியாகப் பதவியிலிருந்து மாற்றப்பட்டார் என்று கேள்வி எழுப்பியுள்ளார். மேலும், சர்வதேசச் சந்தையில் துவரம் பருப்பின் வரத்துக் குறையும் காலங்களிலும், தவெக அரசால் இதே விலைக்குத் தொடர்ந்து பருப்பு கொள்முதல் செய்ய முடியும் என்று மக்கள் முன்னிலையில் தங்களால் உறுதியளிக்க முடியுமா என்றும் அவர் சவால் விடுத்துள்ளார்.

தொடர்ந்து தவெக அரசை விமர்சித்துள்ள அவர், எதிர்காலத்தில் சந்தை நிலவரப்படி துவரம் பருப்பின் விலை உயர்ந்தால், அதையும் நிர்வாகச் சீர்கேடு அல்லது ஊழல் என்று தவெக அரசு இதேபோல் ஏற்றுக் கொள்ளுமா என்றும் கேள்வி எழுப்பியுள்ளார். முந்தைய திமுக ஆட்சியில் கொள்முதல் நடைமுறைகள் அனைத்தும் முற்றிலும் வெளிப்படைத்தன்மையுடன் முறையான விதிகளின்படியே நடைபெற்றன என்றும், தற்போதைய தவெக அரசு வெறும் விளம்பர அரசியல் செய்வதாகவும் முன்னாள் அமைச்சர் சக்கரபாணி குற்றம் சாட்டியுள்ளார்