CRIME
“வீட்டை விட்டு வெளியே போகாதீங்க…” 22 நாட்கள் ஒரே அறையில் அடைத்து வைத்து 4 கோடியைச் சுருட்டிய சைபர் கும்பல்..! பகீர் பின்னணி..!!
நொய்டாவில் சைபர் மோசடிக்காரர்கள், நியூயார்க்கைச் சேர்ந்த ஓய்வுபெற்ற வழக்கறிஞரான அதுல் தல்வார் என்பவரை ‘டிஜிட்டல் கைது’ செய்து சுமார் 4 கோடி ரூபாய் மோசடி செய்துள்ளனர். 1982-ம் ஆண்டு டெல்லியிலிருந்து நியூயார்க் சென்று சுமார் 30 ஆண்டுகள் வழக்கறிஞராகப் பணியாற்றிய இவர், கடந்த ஜூலை 31-ம் தேதி குருகிராமில் உள்ள தனது சகோதரர் வீட்டிற்கு வந்து, நொய்டா செக்டார்-30-ல் உள்ள தனது பூர்வீக வீட்டைப் புதுப்பிக்கும் பணியில் ஈடுபட்டிருந்தார். அப்போது அக்டோபர் 17-ம் தேதி, மும்பை கொலாபா காவல் நிலைய அதிகாரி எனப் பேசிய மோசடிக்காரர்கள், பஹல்காம் பயங்கரவாதத் தாக்குதல் தொடர்பான வழக்கில் இவரது ஆதார் அட்டை சிக்கியுள்ளதாகவும், அதன் மூலம் தொடங்கப்பட்ட கனரா வங்கிக் கணக்கில் 53 கோடி ரூபாய் சட்டவிரோதப் பரிவர்த்தனை நடந்துள்ளதாகவும், அதில் இவர் 5 கோடி ரூபாய் கமிஷன் பெற்றதாகவும் கூறி உடனடியாகக் கைது செய்யப் போவதாக மிரட்டியுள்ளனர்.
இதனைத் தொடர்ந்து, சிபிஐ உதவி இயக்குநர் பெயரில் வாட்ஸ்அப்பில் ரகசியக் கடிதம் ஒன்றை அனுப்பிய கும்பல், ஆடியோ மற்றும் வீடியோ அழைப்புகள் மூலம் 24 மணி நேரமும் அவரைத் தீவிரக் கண்காணிப்பில் வைத்திருந்தது. அக்டோபர் 18-ம் தேதி அவரது வீட்டிற்கு அருகே பயங்கரவாதிகளுடன் தொடர்புடைய இரண்டு ஆயுதமேந்திய காவலர்கள் கைது செய்யப்படுவது போன்ற போலி காட்சிகளைக் காண்பித்து அவரை மேலும் அச்சத்தில் ஆழ்த்தினர். மறுநாள் அக்டோபர் 19-ம் தேதி சிபிஐ மற்றும் என்ஐஏ அதிகாரிகள் போல நடித்து வீடியோ அழைப்பு வழியாக ‘ஆன்லைன் விசாரணை’ நடத்திய மோசடிக்காரர்கள், அவரது தனிப்பட்ட மற்றும் வங்கிக் கணக்கு விவரங்களைப் பெற்றனர். மேலும், சிட்டி வங்கியில் இருந்த அவரது ஓய்வூதியக் கணக்கிலிருந்த 3.80 லட்சம் அமெரிக்க டாலர்கள் மற்றும் இரண்டு புரோக்கரேஜ் கணக்குகளில் இருந்த பணத்தை மாற்றுமாறு ஐடி நிபுணர் ஒருவர் மூலம் அறிவுறுத்தினர்.
பாதிக்கப்பட்ட வழக்கறிஞரின் பெயரில் ஆன்லைன் கிரிப்டோ கணக்கு ஒன்றைத் தொடங்க வைத்த அந்தக் கும்பல், வரி என்ற பெயரில் சுமார் 1.5 கோடி ரூபாயைப் பிடித்தம் செய்துகொண்டதுடன், மீதமுள்ள சுமார் 2.5 கோடி ரூபாயை ‘எத்தேரியம்’ கிரிப்டோகரன்சியாக மாற்றி அபகரித்தது. விசாரணை முடிந்ததும் முழுப் பணமும் வங்கிக் கணக்கிற்குத் திரும்பிவிடும் என நம்பவைத்து, 22 நாட்களில் நவம்பர் 7-ம் தேதிக்குள் மொத்தம் 4 கோடி ரூபாயைச் சுருட்டிய மோசடிக்காரர்கள், பின்னர் தொடர்பைத் துண்டித்துக்கொண்டனர். தான் ஏமாற்றப்பட்டதை உணர்ந்த அதுல் தல்வார், தனது வாழ்நாள் சேமிப்பை இழந்ததோடு பலரிடம் கடனாளியாகவும் மாறிய நிலையில், தற்போது கௌதம் புத்த நகர் சைபர் கிரைம் காவல் நிலையத்தில் புகார் அளித்து வழக்குப் பதிவு செய்துள்ளார்.
