2006-க்கு அப்புறம் இப்பதான்… 400+ ரன்களைச் சேஸ் செய்து மாஸ் காட்டிய இந்தியா… ஒற்றை ஆளாக உலக சாதனை படைத்து மிரட்டிய சுப்மன் கில்..!!

குவாஹாத்தியில் நடைபெற்ற இரண்டாவது ஒருநாள் போட்டியில், மேற்கிந்திய தீவுகள் அணிக்கு எதிராக 406 ரன்கள் என்ற இலக்கை எட்டிப் பிடித்து இந்திய அணி வரலாற்றுச் சிறப்புமிக்க வெற்றியைப் பதிவு செய்துள்ளது. 43.3 ஓவர்களில் 8 விக்கெட்டுகள் வித்தியாசத்தில் வெற்றி பெற்ற இந்திய அணிக்கு, இதுவே ஒருநாள் கிரிக்கெட் வரலாற்றில் மிக அதிகபட்ச வெற்றிகரமான இலக்கு சேஸிங் ஆகும். இதற்கு முன் 2013-இல் ஜெய்ப்பூரில் ஆஸ்திரேலியாவுக்கு எதிராக 362 ரன்களை எட்டியதே இந்தியாவின் சாதனையாக இருந்தது. மேலும், ஒருநாள் கிரிக்கெட் வரலாற்றில் 400-க்கும் மேற்பட்ட இலக்கை வெற்றிகரமாக எட்டிப் பிடித்த இரண்டாவது அணி என்ற பெருமையையும் இந்தியா பெற்றுள்ளது.

இந்திய அணியின் கேப்டன் சுப்மன் கில் முன்னின்று வழிநடத்தி, 133 பந்துகளில் 26 பவுண்டரிகள் மற்றும் 8 சிக்ஸர்களுடன் 223 ரன்கள் விலாசி அசத்தினார். கில்லின் இந்த இரட்டை சதமே இந்தியாவின் வெற்றிக்கு முக்கிய அடித்தளமாக அமைந்தது. அவருடன் ருதுராஜ் கெய்க்வாட் 31 ரன்களுடன் களத்தில் ஆட்டமிழக்காமல் இருக்க, இந்தியா 43.3 ஓவர்களில் 406/2 ரன்களை எட்டி வெற்றி பெற்றது. அதற்கு முன்னதாக முதலில் பேட்டிங் செய்த மேற்கிந்திய தீவுகள் அணி, ஜான் கேம்ப்பெல் (101), ஷாய் ஹோப் (104) மற்றும் அமீர் ஜாங்கு (114) ஆகிய மூவரின் சதங்களின் உதவியால் தங்கள் அணியின் மிகயுயர் ஒருநாள் போட்டியின் ஸ்கோரான 405/7 ரன்களைக் குவித்தது.

ஆண்கள் ஒருநாள் கிரிக்கெட் வரலாற்றில் 400 பிளஸ் இலக்கை எட்டிப் பிடித்த நிகழ்வு இதுவரை இரு முறை மட்டுமே நடந்துள்ளது. முதல் முறை, 2006-இல் ஜோகன்னஸ்பர்க்கில் நடைபெற்ற புகழ்பெற்ற போட்டியில் ஆஸ்திரேலியாவின் 434/4 ரன்களை எதிர்த்து தென் ஆப்பிரிக்கா 49.5 ஓவர்களில் 438/9 ரன்கள் எடுத்து 1 விக்கெட் வித்தியாசத்தில் வெற்றி பெற்று சாதனை படைத்தது. தற்போது தென் ஆப்பிரிக்காவுக்கு அடுத்து 400-க்கும் மேற்பட்ட இலக்கை வெற்றிகரமாகச் சேஸ் செய்த இரண்டாவது அணி என்ற பெருமையையும், சர்வதேச ஒருநாள் கிரிக்கெட்டில் இரண்டாவது மிக அதிகபட்ச ரன் சேஸிங் சாதனையும் இந்தியா தன்வசப்படுத்தியுள்ளது.