“ஜென் Z-க்கு குடும்பம் நடத்த தெரியாது..! அது சாக்கடை தலைமுறை… என விமர்சித்து கங்கனா மீண்டும் சர்ச்சை..!!”

பா.ஜ.க. எம்பியும், நடிகையுமான கங்கனா ரணாவத், டெல்லி ஜந்தர் மந்தரில் நடைபெற்ற நீட் வினாத்தாள் கசிவுக்கு எதிரான மாணவர் போராட்ட வீடியோக்களைத் தனது இன்ஸ்டாகிராம் ஸ்டோரியில் பகிர்ந்து தற்போதைய ‘ஜென் இசட்’ இளம் தலைமுறையினரை கடுமையாக சாடியுள்ளார். அந்தப் போராட்டக் காட்சிகள் தனக்கு வாந்தி வரவைப்பதாகக் குறிப்பிட்ட அவர், ஒரே இடத்தில் இவ்வளவு அசிங்கத்தையும், உறுத்தலான அநாகரிக மொழியையும் தன் வாழ்நாளில் கண்டதில்லை என்று விமர்சித்துள்ளார். மேலும், பண்பாடும் நேர்த்தியும் கொண்ட இந்தியாவில், இளைஞர்கள் தங்களைக் கரப்பான் பூச்சிகள் போல நடத்திக்கொண்டு தங்கள் அழுக்கையும் குப்பையையும் உலகத்தின் மீது திணிப்பதாகக் கூறி, இந்த வீடியோக்களைப் பார்த்த பிறகு தனக்கு ‘டிஜிட்டல் டிடாக்ஸ்’ தேவைப்படுவதாகத் தெரிவித்துள்ளார்.

போராட்டத்தில் ஈடுபட்ட பெண்களைக் குறிப்பிட்டுப் பேசிய கங்கனா, அவர்களை “சாக்கடைத் தலைமுறை” என்று அழைப்பதாகத் தெரிவித்துள்ளார். மேற்கத்தியமயமாக்கப்பட்டதாகக் கூறிக்கொள்ளும் இந்த இந்தியப் பெண்களுக்குச் சமூகத்திற்கு வழங்க எதுவுமில்லை என்றும், இவர்கள் படிப்பிலும் சிறந்து விளங்குவதில்லை, ஒழுக்கக்கேடான குணத்தால் நல்ல இல்லத்தரசிகளாகவும் இருக்க முடியாது என்றும் சாடியுள்ளார். மேலும், போதைப்பொருள் பயன்பாடு, மது அருந்துதல் மற்றும் எல்லையற்ற உடலுறவுத் துணைகளைக் கொண்டிருப்பதை மட்டுமே சுதந்திரமாகப் பெருமையாகப் பேசிக்கொண்டு, வெட்கமில்லாமல் பெற்றோரின் வருமானத்தில் வாழ்வதாகக் கடுமையாக விமர்சித்துள்ளார்.

தொடர்ந்து தனது பதிவில் கருத்து தெரிவித்த கங்கனா, சுயசார்பு ஏதுமின்றி சுதந்திரமான வாழ்க்கைக்காக மட்டுமே இவர்கள் தொடர்ந்து போராடி வருவதாகச் சுட்டிக்காட்டினார். உண்மையான சுதந்திரமான வாழ்க்கை என்பது சொந்த உழைப்பால் மட்டுமே சம்பாதிக்கப்பட வேண்டிய ஒன்று என்று கனிவான நினைவூட்டலாகக் குறிப்பிட்ட அவர், எந்தவித பொறுப்புணர்வும் இல்லாமல் சுதந்திரமாக வாழ நினைப்பவர்கள் வெறும் சீரழிந்த வடிவமே என்றும், அவர்கள் ‘சாக்கடை நபர்’ என்றும் மிகக் காரசாரமாகக் குறிப்பிட்டுள்ளார். கங்கனாவின் இந்த சர்ச்சைக்குரிய பேச்சு சமூக வலைதளங்களில் பெரும் பரபரப்பையும் விவாதத்தையும் ஏற்படுத்தியுள்ளது.