இன்ஸ்டா அழகி விரித்த வலை… நள்ளிரவு 1 மணிக்கு நேரில் பார்க்க போன பேங்க் மேனேஜருக்கு காத்திருந்த பேரதிர்ச்சி… ‘ஹனி ட்ராப்’ வலையில் சிக்கி ரூ.3 லட்சத்தை பறிகொடுத்த அதிகாரி..!!

அசாம் மாநிலம் Tinsukia பகுதியைச் சேர்ந்த தனியார் வங்கி மேலாளர் ஒருவருக்கு, கடந்த ஜூலை மாதம் இன்ஸ்டாகிராம் மூலம் ஒரு பெண்ணுடன் பழக்கம் ஏற்பட்டு நெருக்கமானது. ஆகஸ்ட் 14-ஆம் தேதி அதிகாலை 1 மணியளவில் அந்தப் பெண் அவரை நேரில் சந்திக்க அழைத்து, ஒரு வாடகை வீட்டுக்கு அழைத்துச் சென்றுள்ளார். அங்கு இருவரும் இருந்தபோது திடீரென நுழைந்த இரு ஆண்கள், அங்கு நடந்த சம்பவங்களைச் செல்போனில் படம்பிடித்து, அதனைச் சமூக வலைதளங்களிலும் குடும்பத்தினரிடமும் வெளியிட்டு விடுவதாக மிரட்டியுள்ளனர். அவமானத்திற்குப் பயந்து வங்கி மேலாளர் முதற்கட்டமாக ரூ.2 லட்சமும், பின்னர் ரூ.1 லட்சமும் என மொத்தம் ரூ.3 லட்சம் கொடுத்துள்ளார். அதன் பிறகும் அக்கும்பல் மீண்டும் ரூ.5 லட்சம் கேட்டு மிரட்டியதால், வேறு வழியின்றி அவர் அக்டோபர் 2-ஆம் தேதி காவல் நிலையத்தில் புகார் அளித்தார்.

புகாரின் பேரில் விசாரணையைத் தொடங்கிய போலீசார், முதற்கட்டமாக சஞ்சீவ் தாஸ் மற்றும் அங்கித் பால் ஆகிய இரு இளைஞர்களைக் கைது செய்து நீதிமன்றக் காவலில் அடைத்தனர். தொடர்ந்து நடத்தப்பட்ட தீவிர விசாரணையில், இக்குழுவின் முக்கிய நபராகச் செயல்பட்ட மோரோமி தாஸ் நியோக் என்ற பெண்ணையும், அவரைத் தொடர்ந்து பேபி போரா மற்றும் அவரது கணவர் அங்கித் போரா ஆகியோரையும் போலீசார் கைது செய்தனர். இதன் மூலம் இந்த வழக்கில் கைது செய்யப்பட்டவர்களின் எண்ணிக்கை ஐந்தாக உயர்ந்துள்ளது. தற்போது கைதானவர்களிடமிருந்து பறிமுதல் செய்யப்பட்ட செல்போன்கள் உள்ளிட்ட மின்னணு சாதனங்களை ஆய்வு செய்து, வழக்கின் அடுத்தகட்ட விசாரணையை அதிகாரிகள் தீவிரப்படுத்தியுள்ளனர்.

சமூக வலைதளங்களில் அறிமுகமாகும் நபர்களை முழுமையாக நம்புவதில் இருக்கும் ஆபத்தை உணர்த்தும் இந்தச் சம்பவத்தில், வசதியான வாழ்க்கை வாழும் நபர்கள் மற்றும் உயர் அதிகாரிகளை இலக்காக வைத்து இக்கும்பல் செயல்பட்டிருக்கலாம் என போலீசார் சந்தேகிக்கின்றனர். இணைய வழியில் பழக்கம் ஏற்படுத்தி, நேரில் வரவழைத்து, காணொளி பதிவு செய்து பணம் பறிக்கும் இந்தச் சதியில் வேறு நபர்களுக்கும் தொடர்பு உள்ளதா, மேலும் பலர் இதேபோலப் பாதிக்கப்பட்டுள்ளனரா என்பது குறித்துப் போலீசார் தொடர்ந்து விசாரணை நடத்தி வருகின்றனர்.