இது வெறும் ஆரம்பம்..! விஷால் போட்ட விதை.. விஸ்வரூபம் எடுத்த விவசாயி மகள்! கோல்ட் மெடல் வென்று தமிழகத்திற்கே பெருமை!..இணையதளத்தில் வைரலாகும் நெகிழ்ச்சி சம்பவம்…!!

பணபலம் இல்லாத காரணத்தால் பல ஏழை மாணவர்களின் கனவுகள் பாதியிலேயே கலைந்துவிடும் சூழலில், அவர்களுக்கு ஒரு கலங்கரை விளக்கமாகச் செயல்பட்டு வருகிறது நடிகர் விஷாலின் ‘தேவி சமூக மற்றும் கல்வி அறக்கட்டளை’. தனது தாயாரின் பெயரில் விஷால் நடத்தி வரும் இந்த அறக்கட்டளை, வறிய குடும்பங்களைச் சேர்ந்த நூற்றுக்கணக்கான மாணவர்களின் உயர்கல்விச் செலவை ஏற்று, அவர்களின் எதிர்காலத்திற்கு ஒளியேற்றி வருகிறது. அந்த வகையில், இந்த ஆண்டின் மிக நெகிழ்ச்சியான மற்றும் பெருமிதம் தரக்கூடிய தருணம் ஒன்றை நடிகர் விஷால் தனது சமூக வலைத்தளப் பக்கத்தில் பகிர்ந்துள்ளார். சென்னை சத்தியபாமா அறிவியல் மற்றும் தொழில்நுட்ப நிறுவனத்தின் 35-வது பட்டமளிப்பு விழாவில், தேவி அறக்கட்டளையின் ஆதரவுடன் பயின்ற 10 ஏழை மாணவர்கள் தங்களது இளங்கலைப் பட்டத்தைப் பெற்று சாதனை படைத்துள்ளனர்.

இந்த பட்டமளிப்பு விழாவில் ஒட்டுமொத்த தமிழகத்திற்கும் முன்மாதிரியாக ஒரு மாபெரும் சாதனை அரங்கேறியுள்ளது. விஷாலின் அறக்கட்டளை மூலம் பயின்ற மாணவிகளுள் ஒருவரான தீபிகா என்ற மாணவி, கணினி பயன்பாட்டியல் பிரிவில் பல்கலைக்கழக அளவில் முதலிடம் பிடித்து தங்கப் பதக்கம் வென்று அசத்தியுள்ளார். கடலூர் மாவட்டம் பண்ருட்டியைச் சேர்ந்த தீபிகா, ஒரு எளிய விவசாயக் குடும்பப் பின்னணியைக் கொண்டவர். கடந்த 2023-24 ஆம் ஆண்டில் கடுமையான நிதி நெருக்கடியால் தவித்த இவரை தேவி அறக்கட்டளை தத்தெடுத்து படிக்க வைத்தது. பொருளாதார நெருக்கடியும், வாழ்வாதாரப் போராட்டங்களும் ஒருவரது கல்விக்கு ஒருபோதும் முட்டுக்கட்டையாக இருக்க முடியாது என்பதைத் தனது கடின உழைப்பால் தீபிகா நிரூபித்துக் காட்டியுள்ளார்.

கனவுகளை நனவாக்கிய இந்த இளம் உள்ளங்களின் சாதனையை வார்த்தைகளால் விவரிக்க முடியாது என நெகிழ்ந்துள்ள நடிகர் விஷால், தங்கப் பதக்கம் வென்ற தீபிகாவிற்கு தனது மனமார்ந்த வாழ்த்துகளைத் தெரிவித்துள்ளார். மேலும், இந்த உன்னதமான கல்விப் பயணத்தில் தங்களோடு கைகோர்த்து, இத்தனை ஆண்டுகளாக மாணவர்களின் முன்னேற்றத்திற்கு உறுதுணையாக நின்ற சத்தியபாமா பல்கலைக்கழகத்தின் திருமதி மரியாஜீனா அவர்களுக்கும், கல்லூரி பேராசிரியர்கள் மற்றும் நிர்வாகத்தினருக்கும் தனது நெஞ்சார்ந்த நன்றியைப் பதிவிட்டுள்ளார். “தொடர்ந்து கனவு காணுங்கள், தொடர்ந்து நம்புங்கள், தொடர்ந்து எங்களைப் பெருமைப்படுத்துங்கள்; இது வெறும் ஆரம்பம் மட்டுமே” என மாணவர்களை உத்வேகப்படுத்தும் வகையில் விஷால் வாழ்த்தியுள்ளார்.