“Oh My God…! உண்மையாவா சொல்ற..?” நீண்ட நாள் காத்திருப்புக்குக் கிடைத்த வெற்றி..! அமெரிக்க விசா பெற்ற இந்தியர்… நெகிழ்ச்சியில் மிதக்கும் ‘பாய் த்ராப்’ இசைக்குழு..!!

அமெரிக்க பாப் இசைக்குழுவான ‘பாய் த்ராப்’ , தனது இந்திய உறுப்பினரான தர்ஷன் மக்தூமிற்கு நீண்ட நாட்களாக எதிர்பார்க்கப்பட்ட அமெரிக்க விசா கிடைத்ததை அடுத்து, இறுதியாக அனைத்து உறுப்பினர்களுடனும் இணைந்து முழுமையான குழுவாகச் செயல்பட உள்ளது. மாதக்கணக்கிலான நிச்சயமற்ற நிலைக்குப் பிறகு கிடைத்துள்ள இந்த விசா ஒப்புதல் மூலம், தர்ஷன் அமெரிக்கா சென்று தனது சக இசைக்குழு உறுப்பினர்களுடன் இணைந்து வரவிருக்கும் இசைப் பயணங்களில் பங்கேற்க வழிவகை செய்யப்பட்டுள்ளது. தர்ஷனின் விசா செயல்முறைகளுக்காகக் காத்திருந்த நேரத்தில், மற்ற உறுப்பினர்கள் தங்களின் இசை நிகழ்ச்சிகளைத் தொடர்ந்து நடத்தி வந்த நிலையில், இந்த முக்கிய அறிவிப்பு பாடகருக்கும் அக்குழுவிற்கும் ஒரு மிகப்பெரிய தருணமாக அமைந்துள்ளது.

இந்த மகிழ்ச்சியான செய்தியை ரசிகர்களுடன் பகிர்வதற்காக, தர்ஷன் மக்தூம் தனது விசா ஒப்புதல் குறித்து சக உறுப்பினர்களிடம் இன்ஸ்டாகிராம் ஃபேஸ்டைம் (FaceTime) அழைப்பில் தெரிவிக்கும் உணர்ச்சிப்பூர்வமான வீடியோ ஒன்றை அக்குழு வெளியிட்டுள்ளது. இந்த உரையாடலின் போது தர்ஷன் விசா கிடைத்த தகவலைக் கூறியதும், சக உறுப்பினர்கள் சில நொடிகள் ஆச்சரியத்தில் உறைந்து, பின்னர் மகிழ்ச்சியில் ஆரவாரம் செய்தனர். “கடவுளே, உண்மையாவா சொல்ற?” என்று ஒரு உறுப்பினர் வியப்புடன் கேட்க, “நாம் இதை சாதித்துவிட்டோம்” என்று நெகிழ்ச்சியுடன் கூறி தங்கள் நீண்ட நாள் காத்திருப்பின் நிம்மதியை வெளிப்படுத்தினர்.

தர்ஷன் அமெரிக்கா வர இயலாத காலத்தில், விளம்பரப் புகைப்படங்கள் மற்றும் நிகழ்ச்சிகளின் போது அவரது உருவம் பொறித்த முழு அளவிலான அட்டைப் படத்தைப் பயன்படுத்தி குழுவினர் அவரைத் தங்களுடனே வைத்திருந்தது போன்ற ஒரு தோற்றத்தை உருவாக்கினர். ரசிகர்களின் பேராதரவைப் பெற்ற இந்த அட்டைப் படத்திற்குப் பதிலாக, இனி தர்ஷன் மக்தூம் நேரடியாகவே குழுவுடன் இணையவுள்ளார். இந்த அறிவிப்பு இணையத்தில் வைரலானதைத் தொடர்ந்து, “ஒருவருக்கு விசா கிடைத்ததற்காக நான் இவ்வளவு சந்தோஷப்படுவேன் என்று நினைக்கவே இல்லை” என்றும், “இதைப்பார்த்து எனக்குக் கண்ணீரே வந்துவிட்டது” என்றும் ரசிகர்கள் பலரும் தங்கள் மகிழ்ச்சியையும் வாழ்த்துகளையும் இணையத்தில் பகிர்ந்து வருகின்றனர்.