“50 ரூபாய் இல்லை சார்… 50 ஆயிரம்…!” 9-ஆம் வகுப்பு படிக்கும் வ்லாகரின்… மாத வருமானத்தைக் கேட்டு ஷாக்கான போலீஸ்..!!

பீகாரில் சாலையில் வீடியோ எடுத்துக்கொண்டிருந்த சிறுவனுக்கும் காவல் துறை தரோகாவுக்கும் இடையே நடந்த உரையாடலின் வீடியோ சமூக வலைதளங்களில் வேகமாக பரவி வருகிறது. வீதியில் முன்பக்க கேமராவை ஆன் செய்து வ்லாக் (vlog) செய்துகொண்டிருந்த 9-ஆம் வகுப்பு படிக்கும் சிறுவனை ரோந்துப் பணியில் இருந்த தரோகா அழைத்து பேசுகிறார். அச்சமின்றி கேமராவுடன் தரோகாவிடம் செல்லும் சிறுவனின் தோளில் கைபோட்டு, “இந்த வேலையின் மூலம் ஏதேனும் வருமானம் கிடைக்கிறதா?” என்று அதிகாரி இயல்பாகக் கேட்கிறார்.

முதலில் சிறுவன் புன்னகையுடன் “தேவைக்கேற்ப கிடைக்கிறது” என்று கூறுகிறான். ஆனால், தரோகா மீண்டும் எவ்வளவு வரும் என்று கேட்கும்போது, சிறுவன் தயக்கமின்றி “மாதத்திற்கு சுமார் 50,000 ரூபாய்” என்று கூறுகிறான். இதைக் கேட்டு அதிர்ச்சியடைந்த தரோகா, தவறாகப் புரிந்துகொண்டு “50 ரூபாயா?” எனக் கேட்க, சிறுவன் தெளிவுபடுத்தி “இல்லை, 50,000 ரூபாய்” என்று பதிலளிக்கிறான். தொடர்ந்து சிறுவனிடம் படிப்பைப் பற்றி விசாரித்தபோது, தான் 9-ஆம் வகுப்பு படித்துக்கொண்டே இந்த வ்லாகிங் மற்றும் கன்டென்ட் கிரியேஷன் வேலையைச் செய்து வருவதாகத் தெரிவிக்கிறான்.

இந்த வீடியோ இணையத்தில் வெளியாகி பெரும் விவாதப் பொருளாக மாறியுள்ளது. டிஜிட்டல் யுகத்தில் கன்டென்ட் கிரியேஷனின் வளர்ச்சியைச் சிலர் பாராட்டி வரும் நிலையில், சிறுவன் கூறிய வருமானத் தொகையின் உண்மைத்தன்மை குறித்துச் சிலர் கேள்வி எழுப்புகின்றனர். சிறுவனின் இந்த வருமானக் கூற்றுக்கு அதிகாரப்பூர்வமான எந்தவொரு சான்றும் இல்லையென்றாலும், தரோகாவின் ஆச்சரியமான முகப்பாவனையும், சிறுவனின் தன்னம்பிக்கையான பதிலும் இந்த வீடியோவை இணையத்தில் வைரலாக்கியுள்ளது.