திண்டுக்கல்லில் பயங்கரம்.. சாலையில் ஆறாக ஓடிய 25,000 லிட்டர் ஆசிட்… பீதியில் மக்கள்.. நடந்தது என்ன..? பகீர் பின்னணி..!!

தமிழ்நாட்டின் திண்டுக்கல் மாவட்ட ஆட்சியர் அலுவலகம் அருகே, இன்று அதிகாலையில் ஹைட்ரோகுளோரிக் அமிலம் ஏற்றிச் சென்ற டேங்கர் லாரி கவிழ்ந்த விபத்தில் சுமார் 25,000 லிட்டர் அமிலம் சாலையில் கொட்டிய சம்பவம் பெரும் பரபரப்பை ஏற்படுத்தியுள்ளது. தூத்துக்குடியில் இருந்து கரூர் நோக்கிச் சென்று கொண்டிருந்த அந்த டேங்கர் லாரி, ஓட்டுநரின் தூக்கக் கலக்கம் காரணமாகக் கட்டுப்பாட்டை இழந்து சாலையை விட்டு விலகி கவிழ்ந்ததாக முதற்கட்டத் தகவல்கள் தெரிவிக்கின்றன. அப்போது பின்னால் வந்த மற்றொரு வாகனம் அந்த லாரியின் மீது மோதியதில், டேங்கரின் பின்புறத்தில் இருந்த வெளியேற்றும் வால்வு சேதமடைந்து உள்ளே இருந்த அமிலம் முழுவதும் சாலையில் வேகமாக வெளியேறத் தொடங்கியது.

இந்த விபத்து குறித்துத் தகவல் அறிந்து சம்பவ இடத்திற்கு விரைந்து வந்த தீயணைப்புத் துறையினர், சாலையில் வழிந்தோடிய அமிலத்தின் வீரியத்தைக் குறைப்பதற்காகப் பெருமளவு தண்ணீரைப் பீய்ச்சியடித்து நிலைமையைக் கட்டுக்குள் கொண்டு வந்தனர். மேலும், முன்னெச்சரிக்கை நடவடிக்கையாகச் சேதமடைந்த டேங்கர் லாரியை அதிகாரிகள் சம்பவ இடத்திலேயே பாதுகாப்பாக அப்புறப்படுத்தி நிறுத்தினர். அதிகாலை நேரத்தில் நடந்த இந்தப் பெரும் விபத்தால் அப்பகுதியில் போக்குவரத்து பாதிக்கப்பட்ட நிலையில், காவல்துறையினர் வழக்குப் பதிவு செய்து விபத்து குறித்துத் தீவிர விசாரணை நடத்தி வருகின்றனர்.