“என் உழைப்பு எல்லாம் போச்சே..” விமான நிலையத்தில் கத்தியபடி கதறி அழுத பயணி.. செக்-இன் பேக்கில் காத்திருந்த அதிர்ச்சி.. வைரலாகும் கண்ணீர் வீடியோ..!!

வங்காளதேச தலைநகர் டாக்காவில் உள்ள ஹஸ்ரத் ஷாஜலால் சர்வதேச விமான நிலையத்தில், வெளிநாட்டிலிருந்து திரும்பிய பயணி ஒருவரின் செக்-இன் பேக் கிழிக்கப்பட்டு, அதற்குள் வைக்கப்பட்டிருந்த விலையுயர்ந்த தங்க நகைகள் திருடப்பட்ட சம்பவம் பெரும் பரபரப்பை ஏற்படுத்தியுள்ளது. அந்தப் பயணி தனது பேக் கிழிக்கப்பட்டு, தான் ஆசையாகக் கொண்டு வந்த தங்க நகைகள் அனைத்தும் மாயமாகி இருப்பதைக் கண்டு, விமான நிலைய வளாகத்திலேயே கோபத்தில் கத்தியபடி தேம்பித் தேம்பி அழுதுள்ளார். குறிப்பாக, வளைகுடா நாடுகளில் இருந்து தாயகம் திரும்பும் புலம்பெயர்ந்த தொழிலாளர்கள் மற்றும் பயணிகளின் செக்-இன் பேக்குகளிலிருந்து தங்கம், நகைகள் மற்றும் இதர விலையுயர்ந்த பொருட்கள் திருடப்படும் சம்பவங்கள் இந்த விமான நிலையத்தில் தொடர்கதையாகி வருவது பயணிகளிடையே பெரும் அச்சத்தை ஏற்படுத்தியுள்ளது.

இந்தத் தொடர் திருட்டுச் சம்பவங்கள் காரணமாகவே, விமான நிலைய அதிகாரிகள் பயணிகளுக்குத் தொடர்ந்து ஒரு முக்கிய விழிப்புணர்வு ஆலோசனையை வழங்கி வருகின்றனர். பயணிகள் தங்களுடைய தங்கம், ரொக்கப் பணம் மற்றும் விலையுயர்ந்த வைர, தங்க நகைகளை எக்காரணம் கொண்டும் விமானத்தின் அடியில் செல்லும் செக்-இன் பேக்குகளில் வைக்கக் கூடாது என்றும், அவற்றை எப்போதும் தங்களது கையில் வைத்திருக்கக்கூடிய ஹேண்ட்பேக்குகளிலேயே (Handbags) பாதுகாப்பாக வைத்திருக்க வேண்டும் என்றும் அறிவுறுத்துகிறார்கள். விமான நிலைய ஊழியர்களின் இத்தகைய அலட்சியப்போக்கு மற்றும் திருட்டுச் சம்பவங்கள் குறித்துத் தற்போது சமூக வலைத்தளங்களில் விவாதங்கள் எழுந்துள்ளன.