“மன்னிப்புக் கேளுங்கள்…” நடுரோட்டில் பெண்களைக் கேலி செய்த சிறுவர்கள்.. போலீஸ் கொடுத்த விசித்திரமான தண்டனை.. வைரல் வீடியோவுக்கு எதிராக வெடித்த மெகா விவாதம்..!!

உத்தரப் பிரதேச மாநிலம் லக்னோவில், சிறுவர்கள் என்றும் பாராமல் அவர்களின் காதுகளைப் பிடித்துத் தோப்புக்கரணம் போட வைத்து, ஒட்டுமொத்தப் பகுதியிலும் ஊர்வலமாக அழைத்துச் சென்று பகிரங்கமாக மன்னிப்புக் கேட்க வைத்த லக்னோ போலீஸாரின் அதிரடி நடவடிக்கை தற்பொழுது பெரும் சர்ச்சையையும் விவாதத்தையும் ஏற்படுத்தியுள்ளது. லக்னோவில் உள்ள ஒரு பொது இடத்தில் 6 சிறுவர்கள் நின்று கொண்டு, அவ்வழியாகச் சென்ற பெண்களை நோக்கி ஆபாசமான செய்கைகளில் ஈடுபட்டதாகக் கூறி லக்னோ காவல் துறையினர் இந்த நடவடிக்கையை எடுத்துள்ளனர். இந்த 6 பேரில் 3 பேர் 18 வயதுக்குட்பட்ட மைனர் சிறுவர்கள் ஆவர். இவர்களின் முகங்கள் மற்றும் அடையாளங்களை ரகசியமாக வைக்காமல், போலீஸாரே தங்களது மொபைல் போனில் வீடியோவாகப் பதிவு செய்து சமூக வலைத்தளங்களில் பகிர்ந்ததோடு, அவர்களை நடுரோட்டில் பொது ஊர்வலமாக நடத்தியுள்ளது மனித உரிமை ஆர்வலர்களிடையே கடும் அதிர்ச்சியை ஏற்படுத்தியுள்ளது.

குற்றம் அல்லது தவறுகளில் ஈடுபடும் 18 வயதுக்குட்பட்ட மைனர் சிறுவர்களின் அடையாளங்களை, அவர்களின் எதிர்கால நலன் கருதி எந்தவொரு சூழ்நிலையிலும், எந்தவொரு ஊடகத்திலோ அல்லது பொது வெளியிலோ பகிரங்கமாக வெளிப்படுத்தக் கூடாது என்று நாட்டின் உச்ச நீதிமன்றமும் உயர் நீதிமன்றங்களும் மிகத் தெளிவான சட்ட உத்தரவுகளைப் பிறப்பித்துள்ளன. சட்டத்தைக் காக்க வேண்டிய காவல் துறையினரே, சிறுவர்களின் உரிமைகளை மீறி நீதிமன்ற வழிகாட்டுதல்களுக்கு முரணாக இந்த வீடியோவை வைரலாக்கியுள்ளது சட்டம் ஒழுங்கு மற்றும் மனித உரிமை ரீதியாகப் பெரும் கேள்விகளை எழுப்பியுள்ளது. இருப்பினும், பொது இடங்களில் பெண்களுக்கு அச்சுறுத்தல் தரும் ரௌடி கும்பல்களுக்கு இந்தத் தண்டனை ஒரு தகுந்த பாடம் என்று ஒரு தரப்பினரும், சிறுவர்களுக்கான சட்ட விதிகள் மீறப்பட்டுள்ளதாக மற்றொரு தரப்பினரும் தங்களது கருத்துகளைப் பதிவு செய்து வருகின்றனர்.