“மதுராந்தகத்தில் முட்டை பரோட்டா… தாராபுரத்தில் வீச்சு பரோட்டா…” திமுக, அதிமுகவை கலாய்த்து அமைச்சர் நிர்மல்குமார் போட்ட அதிரடி பதிவு..!!

மதுராந்தகம் மற்றும் தாராபுரம் சட்டமன்றத் தொகுதி இடைத்தேர்தல் முடிவுகளில் தமிழக வெற்றிக் கழகம் (தவெக) அமோக வெற்றி பெற்றுள்ள நிலையில், அக்கட்சியின் நிர்வாகியும் அமைச்சருமான சி.ஆர். நிர்மல் குமார் தனது சமூக வலைதளப் பக்கத்தில் திமுக மற்றும் அதிமுகவை பகடி செய்து வெளியிட்டுள்ள பதிவு அரசியல் வட்டாரத்தில் பெரும் விவாதத்தையும் பேசுபொருளையும் உருவாக்கியுள்ளது.

நடந்து முடிந்த இடைத்தேர்தலில் மதுராந்தகம் மற்றும் தாராபுரம் ஆகிய இரு தொகுதிகளிலும் தவெக வேட்பாளர்கள் வெற்றி பெற்றுள்ளனர். எதிர்க்கட்சிகளான திமுக இரண்டாவது இடத்தையும், அதிமுக மூன்றாவது இடத்தையும் பிடித்துள்ளன. குறிப்பாக, கடந்த சட்டமன்றத் தேர்தலில் அதிமுக சார்பில் வெற்றி பெற்று பின்னர் பதவியை ராஜினாமா செய்துவிட்டு தவெகவில் இணைந்தவர்களுக்கே மீண்டும் போட்டியிட வாய்ப்பளிக்கப்பட்ட நிலையில், இந்த அதிரடி வெற்றி தவெகவின் தேர்தல் பலத்தை நிரூபித்துள்ளதாகக் கூறப்படுகிறது.

இந்த வெற்றியைத் தொடர்ந்து, எதிர்கட்சிகளை நையாண்டி செய்யும் வகையில் சி.ஆர். நிர்மல் குமார் தனது எக்ஸ் தளத்தில், “மதுராந்தகத்தில் முட்ட பரோட்டா.. தாராபுரத்தில் வீச்சு பரோட்டா..” எனப் பதிவிட்டுள்ளார். இந்த நகைச்சுவையான மற்றும் கிண்டலான அரசியல் பதிவு தற்போது சமூக வலைதளங்களில் வைரலாகி வருவதுடன், திமுக மற்றும் அதிமுக கட்சிகளுக்கு எதிரான தவெகவினரின் கேலியைக் காட்டும் வகையிலும் அமைந்துள்ளது.