“ஹலோ போலீஸ்… நான் என் அம்மாவைக் கொன்னுட்டேன்…” பெற்ற தாயைப் பார்க்க வந்த மகன் செய்த கொடூரம்… நெஞ்சை நடுங்க வைக்கும் பகீர் பின்னணி..!!

உத்தரப்பிரதேச மாநிலம் லக்னோவில் உள்ள ராஜேந்திர நகர் சௌராஹா அருகே அமைந்துள்ள விஜன் அபார்ட்மெண்டின் பிளாட் எண்-202-இல், கீதா பாக்சந்தானி (42) என்ற பெண் கொலை செய்யப்பட்டு சடலமாக மீட்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. இச்சம்பவம் தொடர்பாகக் கிடைத்த தகவலின் பேரில் உடனடியாக சம்பவ இடத்திற்கு விரைந்து வந்த நாகா காவல் நிலையப் போலீசார், அவரது உடலைக் கைப்பற்றினர். தடய அறிவியல் துறையினரும் சம்பவ இடத்திற்கு வரவழைக்கப்பட்டு, அங்குள்ள முக்கியச் சான்றுகளைச் சேகரித்தனர். முதற்கட்ட விசாரணையில், அப்பெண்ணின் மண்டையில் பலத்த காயம் ஏற்பட்டுள்ளது தெரியவந்துள்ளது.

போலீசாரின் கூற்றுப்படி, தகராறின் போது அப்பெண்ணின் மைனர் மகன் ஏதோ ஒரு ஆயுதத்தால் தாயின் தலையில் தாக்கியதால் அவர் சம்பவ இடத்திலேயே உயிரிழந்ததாகக் கூறப்படுகிறது. இக்கொடூரச் சம்பவத்திற்குப் பிறகு அங்கேயே இருந்த அந்தச் சிறுவன், தானே காவல்துறைக்கு தொலைபேசியில் அழைத்து “நான் என் தாயைக் கொன்றுவிட்டேன்” என்று தகவல் தெரிவித்துள்ளான். இதனையடுத்து சம்பவ இடத்திற்குச் சென்ற காவல்துறையினர், அந்த மைனர் சிறுவனைக் காவல் கட்டுப்பாட்டிற்குள் கொண்டுவந்து தீவிர விசாரணை மேற்கொண்டு வருகின்றனர்.

கொல்லப்பட்ட பெண்ணின் கணவர் ராகேஷ் இதுகுறித்துத் தெரிவிக்கையில், தனது மகனுக்குக் கடந்த சில ஆண்டுகளாகவே மனநலம் சார்ந்த சிகிச்சை அளிக்கப்பட்டு வருவதாகவும், அவன் தனியாக ஒரு வாடகை வீட்டில் வசித்து வந்ததாகவும் கூறினார். சம்பவத்தன்று தாயைப் பார்க்க வேண்டும் என்று மகன் அடம்பிடித்ததால், அவனைத் தான் தான் விஜன் அபார்ட்மெண்டிற்கு அழைத்து வந்ததாகவும், அப்போது தாய்க்கும் மகனுக்கும் இடையே ஏற்பட்ட தகராறில் இச்சம்பவம் நடந்துள்ளதாகவும் தெரிவித்தார். தற்போது சிறுவனிடம் விசாரணை நடத்தப்பட்டு வரும் நிலையில், பிரேதப் பரிசோதனை அறிக்கை மற்றும் தொடர் விசாரணையின் அடிப்படையில் அடுத்தகட்ட நடவடிக்கை எடுக்கப்படும் எனப் போலீசார் தெரிவித்துள்ளனர்.