“தயவுசெய்து போகாதீங்க… உங்களை ரொம்ப மிஸ் பண்ணுவேன்…” இந்தியக் குடும்பத்திடம் பாசத்தைக் கொட்டிய அமெரிக்கப் பெண்..! நெகிழ வைக்கும் வைரல் வீடியோ..!!

அமெரிக்காவிலிருந்து இந்தியா திரும்பிய இந்தியத் தம்பதியினருக்கு, அவர்களின் அமெரிக்க அண்டை வீட்டுப் பெண் அழுதபடியே விடை கொடுத்த உணர்ச்சிப்பூர்வமான வீடியோ ஒன்று இணையத்தில் வைரலாகி வருகிறது. அமெரிக்காவில் வசித்து வந்த விஜய் கொக்கேரகட்டா மற்றும் அவரது மனைவி இந்தியா திரும்ப ஆயத்தமான போது, அவர்களின் அமெரிக்க அண்டை வீட்டுப் பெண் அவர்களை வழி அனுப்ப வந்தார். அப்பொழுது, அந்தப் பெண் தம்பதியரை இறுக்கமாகக் கட்டிப்பிடித்து, “தயவுசெய்து போகாதீர்கள், உங்களை நான் மிகவும் இழக்கப் போகிறேன்” என்று கண்ணீர் விட்டு அழுதார். இந்த நெகிழ்ச்சியான தருணத்தைக் கண்டு இந்தியத் தம்பதியும் உணர்ச்சிவசப்பட்டு அவரைத் தேற்ற முயன்றனர்.

இந்த விடைபெறும் தருணத்தை தம்பதியரின் நண்பர் ஒருவர் அவர்களுக்குத் தெரியாமல் ரகசியமாக வீடியோ படம்பிடித்துள்ளார். பின்னர் அந்த வீடியோவை விஜய் கொக்கேரகட்டாவிற்கு அவர் நினைவாக அனுப்பியுள்ளார். அவர்கள் டெட்ராய்ட் விமான நிலையத்திற்குப் புறப்படுவதற்கு முன் நடந்த இந்த இயல்பான மற்றும் உண்மையான பாசப் பகிர்வு, இரு வேறு கலாச்சாரங்களையும் நாடுகளையும் சேர்ந்த குடும்பங்களுக்கு இடையே உருவான நெருக்கமான நட்பையும் பிணைப்பையும் வெளிப்படுத்துவதாக அமைந்தது.

இந்த வீடியோ இன்ஸ்டாகிராமில் பகிரப்பட்டதைத் தொடர்ந்து, பலரின் இதயங்களை வென்று இணையத்தில் வைரலானது. எந்தவித பகட்டும் இன்றி, இரு குடும்பங்களுக்கு இடையேயான உண்மையான அன்பையும் நட்பையும் காட்டும் இந்த வீடியோவைப் பார்த்த பல இணையவாசிகளும் தங்களின் அனுபவங்களைப் பகிர்ந்து பாராட்டி வருகின்றனர். எல்லைகளையும் கலாச்சார வேறுபாடுகளையும் தாண்டி மனித நேயமும் அன்பும் நிலவுவதற்கு சான்றாக இந்த நிகழ்வு அமைந்துள்ளதாகப் பலரும் கருத்து தெரிவித்து வருகின்றனர்.