திமுக முன்னாள் அமைச்சர் சேகர்பாபு மீது வழக்குபதிவு.. சற்றுமுன் பரபரப்பு..!!

சென்னை வேப்பேரி காவல் ஆணையர் அலுவலக நுழைவாயிலில் காவல்துறையினருடன் வாக்குவாதத்தில் ஈடுபட்ட திமுக முன்னாள் அமைச்சர் பி.கே. சேகர்பாபு மீது இரண்டு பிரிவுகளின் கீழ் போலீஸார் வழக்குப் பதிவு செய்துள்ளனர். தனியார் பள்ளி முறைகேடு வழக்கில் கைது செய்யப்பட்ட திமுக முன்னாள் அமைச்சர் அன்பில் மகேஷ் பொய்யாமொழியை, விசாரணைக்காக காவல் ஆணையர் அலுவலகத்திற்கு அழைத்து வந்தபோது இந்தச் சம்பவம் நிகழ்ந்துள்ளது.

அன்பில் மகேஷைக் காண்பதற்கு தமக்கும் தங்களது கட்சியினருக்கும் அனுமதி வழங்கப்படாததால், நுழைவாயில் முன்பாக நின்றிருந்த அதிகாரிகளுடன் சேகர்பாபு மற்றும் திமுகவினர் கடும் வாக்குவாதத்தில் ஈடுபட்டனர். தங்களை உள்ளே அனுமதிக்கக் கோரி காவல்துறையினரின் நடைமுறைகளை எதிர்த்து அவர்கள் அங்கே திரண்டதால் பரபரப்பான சூழல் உருவானது.

இதையடுத்து, அரசு ஊழியர்களை முறையாகப் பணி செய்யவிடாமல் தடுத்தல் மற்றும் பொது இடத்தில் அதிகாரிகளை அவமரியாதையாகப் பேசுதல் ஆகிய இரண்டு சட்டப் பிரிவுகளின் கீழ் வேப்பேரி காவல் நிலைய போலீஸார் சேகர்பாபு மீது இந்த அதிரடி சட்ட நடவடிக்கையை மேற்கொண்டுள்ளனர்.