“நாம ஆசையா சாப்பிடுற லேஸ், மேகி எல்லாமே போலியா.. ?!” கெமிக்கல் வச்சு எக்ஸ்பைரி டேட்டை அழிச்சு புது ஸ்டிக்கர் ஒட்டி பகீர் மோசடி.. FSSAI மற்றும் போலீசாரின் அதிரடி வேட்டை.. வைரலாகும் ஷாக்கிங் வீடியோ..!!

மகாராஷ்டிர மாநிலம் நவி மும்பையின் துர்பே பகுதியில் உள்ள டிடிசி தொழிற்பேட்டையில் இயங்கி வந்த ‘சாதனா எண்டர்பிரைசஸ்’ என்ற நிறுவனத்தில், உணவுப் பொருட்களின் காலாவதி தேதிகளை போலியாக மாற்றி விற்பனை செய்ய முயன்ற மாபெரும் மோசடி சாம்ராஜ்யத்தை உணவு மற்றும் மருந்து நிர்வாகத்துறை மற்றும் நவி மும்பை குற்றப்பிரிவு போலீஸார் அதிரடி சோதனை நடத்தி முறியடித்துள்ளனர். அந்த நிறுவனத்தில் காலாவதியான பழைய உணவுப் பொட்டலங்களின் தேதிகளை ரசாயனங்கள் மூலம் அழித்துவிட்டு, அதற்குப் பதிலாகப் புதிய உற்பத்தி மற்றும் காலாவதி தேதிகளைப் போலியாக அச்சிட்டு ஒட்டி வந்துள்ளனர். மேலும், பொருட்களின் உட்பொருட்கள் மற்றும் ஊட்டச்சத்து விவரங்கள் அடங்கிய புதிய ஸ்டிக்கர்களையும் அவர்கள் மாற்றி அமைத்திருந்தது விசாரணையில் அம்பலமாகியுள்ளது. இந்த அதிரடி சோதனையில், சுமார் 5.75 கோடி ரூபாய் மதிப்புள்ள 4,142 கார்ட்டன் உணவுப் பொருட்களை அதிகாரிகள் மொத்தமாகப் பறிமுதல் செய்துள்ளனர்.

https://twitter.com/nextminutenews7/status/2094648154759262694/video/1

இந்த மாபெரும் மோசடியில் லேஸ், குர்குரே, பிங்கோ , ஃபன் ஃபிளிப்ஸ், மேகி, ரசோய், நூர், ஹெல்மேன்ஸ், தம்ஸ் அப், மற்றும் லிம்கா உள்ளிட்ட முன்னணி பிராண்டுகளின் பொருட்கள் சிக்கியுள்ளன. இந்த இருப்பு மொத்தம் 10 முன்னணி நிறுவனங்களுடன் தொடர்புடையதாகும். இதுதவிர, பேக்கேஜிங்கை அப்பட்டமாகப் போலியாகத் தயாரிப்பதற்காக வைக்கப்பட்டிருந்த லேபிள் இல்லாத மேலும் 30,600 ரூபாய் மதிப்புள்ள காலாவதியான உணவுப் பொருட்களையும் போலீஸார் பறிமுதல் செய்துள்ளனர். இச்சம்பவம் தொடர்பாகத் துர்பே காவல் நிலையத்தில் இந்திய உணவுப் பாதுகாப்பு மற்றும் தர நிர்ணயச் சட்டம் மற்றும் பாரதிய நியாய சன்ஹிதா ஆகியவற்றின் கீழ் எஃப்.ஐ.ஆர் பதிவு செய்யப்பட்டுள்ளது. மேலும், இந்த அராஜகத்தில் ஈடுபட்ட சாதனா எண்டர்பிரைசஸ் நிறுவனத்தின் உணவு உரிமத்தை நிரந்தரமாக ரத்து செய்வதற்கான அதிரடி நடவடிக்கைகளையும் அதிகாரிகள் தற்பொழுது முடுக்கிவிட்டுள்ளனர்.