“புல் அறுக்கத்தானே போனாங்க” மனைவியைக் காப்பாற்ற ஓடிய கணவன்… விவசாய நிலத்தில் காத்திருந்த மரணம்.. ஒரே நொடியில் அனாதையான 3 பிள்ளைகள்…!!

மத்தியப் பிரதேசம் சத்தர்பூர் மாவட்டத்தில், விவசாய நிலத்தில் கால்நடைகளுக்காகப் புல் அறுத்துக் கொண்டிருந்த தம்பதியினர் மின்சாரம் தாக்கி பரிதாபமாக உயிரிழந்த துயரச் சம்பவம் நிகழ்ந்துள்ளது. உயிரிழந்த குடும்பத் தலைவர் சந்திரபான் விஸ்வகர்மா என அடையாளம் காணப்பட்டுள்ளார். இவர்கள் வேலை செய்து கொண்டிருந்த விவசாய நிலத்தில் தண்ணீர் தேங்கியிருந்த நிலையில், அதன் வழியே சென்ற மின்சாரக் கம்பி அறுந்து விழுந்து இந்த விபத்து நேரிட்டுள்ளது.

விவசாய நிலத்தில் தேங்கியிருந்த தண்ணீரில் மின்சாரம் பாய்ந்து கொண்டிருந்ததை அறியாத சந்திரபானின் மனைவி, எதிர்பாராதவிதமாக முதலில் மின்சாரக் கம்பியின் பிடியில் சிக்கியுள்ளார். ஆபத்தான நிலையில் மனைவி அலறுவதைக் கண்டு அதிர்ச்சியடைந்த சந்திரபான், அவரை எப்படியாவது காப்பாற்ற வேண்டும் என்ற பதற்றத்தில் ஓடிச் சென்றுள்ளார். ஆனால், துரதிர்ஷ்டவசமாக அவரும் அந்த மின்சாரத்தின் பிடியில் சிக்கியுள்ளார்.

பாதிக்கப்பட்டவர்களின் விவசாய நிலம் குடியிருப்புகளில் இருந்து சற்றுத் தொலைவில் அமைந்திருந்ததால், விபத்து நடந்த நேரத்தில் உடனடியாக யாருக்கும் தகவல் தெரியவில்லை. அலறல் சத்தம் கேட்டு கிராம மக்கள் சம்பவ இடத்திற்கு ஓடி வருவதற்குள், மின்சாரத்தின் வீரியம் தாங்காமல் தம்பதியினர் இருவரும் சம்பவ இடத்திலேயே பரிதாபமாக உயிரிழந்தனர். பின்னர் கிராம மக்களின் உதவியுடன் இருவரது உடல்களும் மீட்கப்பட்டு மாவட்ட அரசு மருத்துவமனைக்கு அனுப்பி வைக்கப்பட்டன.

இந்தக் கொடூர விபத்தின் காரணமாக, அந்தத் தம்பதியரின் 8 வயது மகள், 6 வயது மகன் மற்றும் 4 வயதுடைய மிகச் சிறிய ஆண் குழந்தை ஆகிய மூவரும் ஒரே நாளில் தங்களது பெற்றோரை இழந்து அனாதையாக தவிக்கின்றனர். பிஞ்சு குழந்தைகளின் எதிர்காலம் கேள்விக்குறியாகியுள்ள இந்தச் சம்பவம் ஒட்டுமொத்த கிராமத்தையும் சோகத்தில் மூழ்கடித்துள்ளது. இச்சம்பவம் குறித்து வழக்குப் பதிவு செய்துள்ள உள்ளூர் காவல் துறையினர், மின்சாரக் கம்பியின் நிலை குறித்தும், விபத்து நிகழ்ந்த சூழல் குறித்தும் தீவிர விசாரணை மேற்கொண்டு வருகின்றனர்.