“அப்பா அம்மாவை தடியால் அடிச்சிக்கிட்டே இருந்தார்…” 5 வயது சிறுமி கண்முன்னே நடந்த கொடூரம்..! குடும்பத் தகராறில் மனைவியை அடித்துக் கொன்ற கணவன்.. நெஞ்சை பதறவைக்கும் சம்பவம்..!!

பீகார் மாநிலம் வைஷாலி மாவட்டம் பிதுபூர் காவல் எல்லைக்கு உட்பட்ட மதுராபூர் பகுதியில், குடும்பத் தகராறு காரணமாக 22 வயதான ஆஷா தேவி என்ற பெண்ணை அவரது கணவர் சுஜீத் பாஸ்வான் தடியால் அடித்துக் கொன்றுள்ளார். இச்சம்பவத்திற்குப் பிறகு குற்றஞ்சாட்டப்பட்ட கணவனும் அவரது குடும்பத்தினரும் வீட்டை விட்டுத் தப்பி ஓடிவிட்டனர். உயிரிழந்த பெண்ணின் உடலுக்கு அருகில் அவரது 5 வயது மகள் அன்ஷிகா குமாரி மட்டுமே தனியாக இருந்துள்ளார். உயிரிழந்த ஆஷா தேவியின் பெற்றோர் வீட்டிற்குத் தகவல் தெரிவிக்கப்பட்டு, அந்தச் சிறுமி தந்தை தன் தாயைக் கொடூரமாகத் தாக்கிய நிகழ்வை விவரித்துள்ளார்.

கொல்லப்பட்ட ஆஷா தேவி மற்றும் சுஜீத் பாஸ்வான் ஆகிய இருவருக்குமே இது இரண்டாவது திருமணமாகும். இருவரது முதல் வாழ்க்கைத் துணைகளும் நோயினால் உயிரிழந்த நிலையில், கடந்த இரண்டரை ஆண்டுகளுக்கு முன்பு இவர்களுக்குத் திருமணம் நடந்துள்ளது. சுஜீத்திற்கு முதல் மனைவி மூலம் இரண்டு குழந்தைகள் உள்ள நிலையில், ஆஷா தேவி தனது முதல் கணவரின் 5 வயது மகளுடன் சுஜீத்தின் வீட்டிற்கு வந்துள்ளார். குழந்தைகள் தொடர்பாகவும், குடும்பச் சூழல் காரணமாகவும் இருவருக்கும் இடையே அடிக்கடி தகராறு ஏற்பட்டு வந்ததாகக் கூறப்படுகிறது. மேலும், கடந்த ஐந்து நாட்களாக ஆஷா தேவிக்கு உணவளிக்காமல் கொடுமைப்படுத்தியதாகவும், சம்பவத்திற்கு முந்தைய நாள் இரவே தன்னை அழைத்துச் செல்லுமாறு தாய் வீட்டிற்கு ஆஷா போன் செய்து கதறியதாகவும் உறவினர்கள் தெரிவித்துள்ளனர்.

தகவல் அறிந்து சம்பவ இடத்திற்கு விரைந்து வந்த பிதுபூர் காவல் நிலைய அதிகாரி ரவி பிரகாஷ் தலைமையிலான போலீசார், தடய அறிவியல் குழுவை வரவழைத்து விசாரணையைத் தொடங்கினர். பெண்ணின் உடலைக் கைப்பற்றி பிரேதப் பரிசோதனைக்காக ஹாஜிப்பூர் சதர் மருத்துவமனைக்கு அனுப்பி வைத்துள்ளனர். தப்பியோடிய கணவன் மற்றும் அவரது குடும்பத்தினரைத் தேடும் பணியில் ஈடுபட்டுள்ள போலீசார், உயிரிழப்பிற்கான முழுமையான காரணங்கள் குறித்து விசாரணை நடத்தி வருகின்றனர்.