“இதெல்லாம் எங்க போய் முடியுமோ..” 6 மாதம் முன் உயிரிழந்த தூய்மை பணியாளர்… வேலைக்கு ஏன் வரலன்னு நோட்டீஸ் அனுப்பிய அதிகாரிகள்..!!

உத்தரப்பிரதேச மாநிலம் உன்னாவ் மாவட்டத்தில் அரசுத்துறையின் விசித்திரமான மற்றும் அதிர்ச்சியூட்டும் அலட்சியப் போக்கு ஒன்று வெளிச்சத்திற்கு வந்துள்ளது. ஃபதேபூர் 84 தொகுதியில், கடந்த ஆறு மாதங்களுக்கு முன்பு உயிரிழந்த தூய்மைப் பணியாளர் ஒருவருக்கு மீண்டும் பணி ஒதுக்கியதோடு, அவர் பணிக்கு வரவில்லை எனக் கூறி காரணத்தைக் கேட்டு நோட்டீஸ் அனுப்பப்பட்டுள்ள விவகாரம் பெரும் பரபரப்பை ஏற்படுத்தியுள்ளது.

அப்பகுதியில் சஞ்சாரி நோய் கட்டுப்பாட்டு இயக்கத்தின் கீழ் கிராமங்கள் மற்றும் பள்ளிகளில் தூய்மைப் பணிகளை மேற்கொள்ளத் தூய்மைப் பணியாளர்களின் பட்டியல் தயார் செய்யப்பட்டது. இதில் துஹான் கிராமம் மற்றும் அங்கிருக்கும் தொடக்கப்பள்ளியில் துப்புரவுப் பணியாளர் ஹரிச்சந்திரா என்பவருக்குப் பணி நியமனம் வழங்கப்பட்டது. கடந்த அக்டோபர் 29ஆம் தேதி வரை அங்குத் தூய்மைப் பணிகள் மேற்கொள்ளப்படாததாலும், ரோஸ்டர் பட்டியல்படி குறிப்பிட்ட பணியாளர் வேலைக்கு வராததாலும் தொடக்கப்பள்ளித் தலைமை ஆசிரியர் புகார் அளித்தார்.

இதன் அடிப்படையில், ஏ.டி.ஓ. பஞ்சாயத்து துறை சார்பில் பணியில் அலட்சியம் காட்டியதாகக் கூறி மொத்தம் 11 தூய்மைப் பணியாளர்களுக்குக் காரணத்தைக் கேட்கும் நோட்டீஸ் வழங்கப்பட்டது. இதில் சுமார் ஆறு மாதங்களுக்கு முன்பு அதாவது கடந்த மே மாதமே இறந்துபோன ஹரிச்சந்திராவின் பெயரும் இடம்பெற்றிருந்தது தெரியவந்தது. இந்தத் தவறு குறித்துப் பேசிய வட்டார வளர்ச்சி அலுவலர் (பி.டி.ஓ.) கியான்வேந்திர குமார், பட்டியல் தயாரிக்கும்போது கணினி ஆப்பரேட்டரின் கவனக்குறைவால் இறந்த பணியாளரின் பெயர் சேர்க்கப்பட்டுவிட்டதாகத் தெரிவித்துள்ளார். மேலும், இச்சம்பவம் தொடர்பாக சம்பந்தப்பட்ட கணினி ஆப்பரேட்டர் மற்றும் ஏ.டி.ஓ. பஞ்சாயத்து ஆகியோரிடம் மாவட்ட பஞ்சாயத்து ராஜ் அதிகாரி (டி.பி.ஆர்.ஓ.) விளக்கம் கேட்டுள்ளார்.