LATEST NEWS
“20 கிரெடிட் கார்டு, டெஸ்லா கார், மான் கொம்புகள்” பின்னணியில் பெரிய புள்ளிகளா? போலி ஐ.ஏ.எஸ். மணீஷ் குப்தா வீட்டைச் சுற்றி வளைத்த போலீஸ்… விசாரணையில் திடுக்கிடும் தகவல்கள்!
பிகார் மாநிலம் ககாரியா பகுதியில் போலி ஐ.ஏ.எஸ். அதிகாரியாக வலம் வந்ததாகக் கூறப்படும் மணீஷ் குப்தா கைது செய்யப்பட்டதைத் தொடர்ந்து, அவரது இல்லத்தில் காவல்துறையினர் அதிரடிச் சோதனை மேற்கொண்டனர். இந்தச் சோதனையின்போது ஆடம்பர டெஸ்லா கார், 20 கிரெடிட் கார்டுகள், 4 காசோலைப் புத்தகங்கள் மற்றும் 5 செல்போன்கள் உள்ளிட்ட பல்வேறு பொருட்கள் பறிமுதல் செய்யப்பட்டுள்ளதாகத் தெரிவிக்கப்பட்டுள்ளது.
மேலும், அவரது வீட்டில் இருந்து ‘பாராசிங்கா’ எனப்படும் அரிய வகை இரலைமானின் இரண்டு கொம்புகளும் கண்டெடுக்கப்பட்டுள்ளது பெரும் பரபரப்பை ஏற்படுத்தியுள்ளது. இந்த வனவிலங்கு பொருட்கள் அவருக்கு எவ்வாறு கிடைத்தன என்பது குறித்தும், வனவிலங்கு பாதுகாப்புச் சட்டப் பிரிவுகளின் கீழ் இதுதொடர்பாக என்னென்ன நடவடிக்கைகள் எடுக்க முடியும் என்பது குறித்தும் காவல்துறையினர் விரிவான விசாரணையைத் தொடங்கியுள்ளனர்.
போலி அடையாளத்தைப் பயன்படுத்தி மணீஷ் குப்தா எவ்வாறு அதிகாரப்பூர்வமாகச் செயல்பட்டார், இந்த மோசடியின் பின்னணியில் பெரிய புள்ளிகள் யாரேனும் உள்ளனரா என்பது குறித்து தீவிர விசாரணை நடைபெற்று வருகிறது. கைப்பற்றப்பட்ட ஆவணங்கள் மற்றும் மின்னணுச் சாதனங்கள் மூலமும் அவரது சட்டவிரோதத் தொடர்புகள் குறித்து அதிகாரிகள் ஆய்வு செய்து வருகின்றனர்.
