பயங்கரம்..! மருத்துவமனை மோதலைத் தடுக்கச் சென்ற பெண் போலீஸ் தள்ளிவிட்டுக் கொலை… தலையில் அடிபட்டு துடிதுடித்து இறந்த சோகம்..!!

ராமநாதபுரம் மாவட்டம் பரமக்குடி அரசு தலைமை மருத்துவமனையில் சிகிச்சைக்காக வந்த இரு தரப்பு இளைஞர்களிடையே ஏற்பட்ட பயங்கர மோதலைத் தடுக்க முயன்ற பெண் தலைமை காவலர் கண்ணகி (35) கொடூரமாகத் தள்ளிவிடப்பட்டு பரிதாபமாக உயிரிழந்தார். மருத்துவமனை வளாகத்திற்குள்ளேயே பாதுகாப்புப் பணியில் ஈடுபட்டிருந்த பெண் போலீஸ் ஒருவர், மர்மக் கும்பலின் மோதலால் உயிரிழந்த இந்தச் சம்பவம் ஒட்டுமொத்த காவல் துறையினரிடையேயும், பொதுமக்கள் மத்தியிலும் பெரும் அதிர்ச்சியையும் சோகத்தையும் ஏற்படுத்தியுள்ளது.

பரமக்குடி மருத்துவமனையில் ஏற்கனவே ஏற்பட்ட ஒரு தகராறு காரணமாகச் சிகிச்சை பெறுவதற்காக இரு தரப்பைச் சேர்ந்த இளைஞர்கள் வந்துள்ளனர். அப்போது, மருத்துவமனை வளாகத்திற்குள் அவர்கள் மீண்டும் ஒருவரையொருவர் பயங்கரமான ஆயுதங்களோடு தாக்கிக் கொண்டு கோஷ்டி மோதலில் ஈடுபட்டுள்ளனர். அங்கிருந்த சூழ்நிலை மோசமடைந்ததைத் தொடர்ந்து, அங்கு பாதுகாப்புப் பணியில் இருந்த பெண் தலைமை காவலர் கண்ணகி, சற்றும் யோசிக்காமல் துணிச்சலுடன் முன்னால் சென்று அந்த இளைஞர்களின் மோதலைத் தடுத்து நிறுத்த தீவிரமாக முயன்றுள்ளார்.

அப்போது அந்த மோதலில் ஈடுபட்டிருந்த கும்பலில் இருந்த கருப்புராஜா என்ற இளைஞர், தங்களை தடுத்த பெண் காவலர் கண்ணகியை ஆத்திரத்தில் ஓங்கிப் பலமாகத் தள்ளிவிட்டுள்ளார். இதில் நிலைதடுமாறி கீழே விழுந்த கண்ணகியின் தலையில் பலத்த காயம் ஏற்பட்டு, அவர் சம்பவ இடத்திலேயே துடிதுடிக்க உயிரிழந்தார். இச்சம்பவத்தை அடுத்து அங்கிருந்து தப்பியோடிய கொடூர குற்றவாளியான கருப்புராஜா மற்றும் மோதலில் ஈடுபட்ட பிற இளைஞர்களைப் பிடிக்க போலீசார் தனிப்படைகள் அமைத்துத் தீவிரமாகத் தேடி வருகின்றனர்.