மாணவிகளுக்கு குட் நியூஸ்: அனைத்துப் பள்ளிகளிலும் சானிடரி நாப்கின் மெஷின் கட்டாயம்.. தமிழக அரசின் அதிரடி உத்தரவு…!!

தமிழ்நாட்டில் உள்ள அனைத்துப் பள்ளிகளிலும் சானிடரி நாப்கின் வழங்கும் இயந்திரங்கள் மற்றும் எரியூட்டும் இயந்திரங்கள் முறையாகச் செயல்படுவதை உறுதி செய்ய வேண்டும் என்று பள்ளிக் கல்வித்துறை அதிரடி உத்தரவு பிறப்பித்துள்ளது. இது தொடர்பாக அனைத்து மாவட்ட முதன்மைக் கல்வி அலுவலர்களுக்கும் விரிவான சுற்றறிக்கை அனுப்பப்பட்டுள்ளது. மாணவிகளின் உடல் நலம், பள்ளி வருகை மற்றும் மாதவிடாய் கால சுகாதாரத்தை மேம்படுத்தும் நோக்கில் இந்தத் திட்டம் தீவிரமாக முடுக்கிவிடப்பட்டுள்ளது.

இந்த வழிகாட்டுதல்களின்படி, உள்கட்டமைப்பு வசதிகள் குறைவாக இருந்து நாப்கின் இயந்திரங்களை அமைக்க முடியாத பள்ளிகளில், தலைமை ஆசிரியர்கள் மற்றும் பெண் ஆசிரியர்கள் மூலமாக மாணவிகளுக்கு நேரடியாக சானிடரி நாப்கின்கள் தடையின்றிக் கிடைப்பதை உறுதி செய்ய வேண்டும் என அறிவுறுத்தப்பட்டுள்ளது. அத்துடன், பள்ளிகளில் தடையற்ற நீர் இணைப்புடன் கூடிய சுகாதாரமான பெண் கழிப்பறைகள் இருப்பதை மாவட்டக் கல்வி அதிகாரிகள் தொடர்ந்து ஆய்வு செய்ய வேண்டும் என்றும், பழுதடைந்த இயந்திரங்களை உடனடியாகப் பழுதுநீக்க நடவடிக்கை எடுக்க வேண்டும் என்றும் உத்தரவிடப்பட்டுள்ளது.

பள்ளி மாணவிகளிடையே பருவமடைதல் மற்றும் மாதவிடாய் கால சுகாதாரம் குறித்த விழிப்புணர்வை ஏற்படுத்துவதும் இந்தத் திட்டத்தின் முக்கிய நோக்கமாகும். இதற்காகப் பள்ளிகளில் சிறப்பு விழிப்புணர்வு முகாம்கள் நடத்தப்படவுள்ளன. மேலும், பயன்படுத்தப்பட்ட நாப்கின்களைச் சுகாதாரமான முறையில் எரியூட்டி அழிப்பதற்கான இயந்திரங்கள் சரியாக இயங்குவதை உறுதி செய்வதன் மூலம் பள்ளி வளாகங்கள் தூய்மையாகவும், மாணவிகளுக்குப் பாதுகாப்பானதாகவும் மாற்றப்படும் என்று கல்வித்துறை அதிகாரிகள் தெரிவித்துள்ளனர்.