LATEST NEWS
“நான் எந்த மண்ணையும் எடுக்கவில்லை… எனக்குத் தெரியாது..!” ரெய்டுக்குப் பிறகு முன்னாள் அமைச்சர் மூர்த்தி கொடுத்த பகீர் விளக்கம்..!!
கல்குவாரி மற்றும் செம்மண் முறைகேடு புகார் தொடர்பாக மதுரை ஐயர் பங்களா பகுதியில் உள்ள திமுக முன்னாள் அமைச்சர் பி. மூர்த்தியின் இல்லத்தில் மாவட்ட குற்றப்பிரிவு காவல்துறையினர் நடத்திய சோதனை பெரும் பரபரப்பை ஏற்படுத்தியுள்ளது. சோதனைக்குப் பிறகு செய்தியாளர்களைச் சந்தித்த முன்னாள் அமைச்சர் மூர்த்தி, தன் மீதான குற்றச்சாட்டுகளை திட்டவட்டமாக மறுத்துள்ளார். “நான் எந்த மண்ணையோ, சரளைக்கற்களையோ, ஜல்லியோ எடுக்கவில்லை; அது குறித்து எனக்கு எதுவும் தெரியாது, தெரியாது” என்று கூறிய அவர், கடந்த 2019-ஆம் ஆண்டு மாவட்ட ஆட்சியரின் முறையான அனுமதி பெற்றே குவாரியைக் குத்தகைக்கு விட்டதாகவும், அங்கு நடந்த விதிமீறல்களுக்கும் தனக்கும் எந்தத் தொடர்பும் இல்லை என்றும் விளக்கமளித்துள்ளார்.
மேலும், சோதனை நடைபெற்ற போது திமுக தலைவர் மு.க. ஸ்டாலின் தன்னைத் தொலைபேசியில் தொடர்பு கொண்டு பேசியது குறித்தும் மூர்த்தி பகிர்ந்து கொண்டார். தொலைபேசியில் அழைத்த மு.க. ஸ்டாலின், “அங்கு என்ன நடக்கிறது?” என விசாரித்து விவரங்களைக் கேட்டறிந்ததாகவும், அரசியல் காரணங்களுக்காகப் போடப்படும் இதுபோன்ற பொய் வழக்குகளைக் கண்டு அஞ்சத் தேவையில்லை எனத் தைரியம் அளித்ததாகவும் அவர் தெரிவித்தார். தன் வீட்டில் நடத்தப்பட்ட இந்தச் சோதனையில் எந்த உண்மையும் இல்லை என்றும், இந்த விவகாரத்தை நீதிமன்றத்தை அணுகிச் சட்டரீதியாக எதிர்கொண்டு நிரபராதி என நிரூபிப்பேன் என்றும் முன்னாள் அமைச்சர் மூர்த்தி உறுதியுடன் தெரிவித்துள்ளார்.
