“இனி உங்க இஷ்டம் தான்” திமுகவுக்கு இனி நோ காம்ப்ரமைஸ்.. விசிக தொண்டர்களுக்கு திருமாவளவன் கொடுத்த அதிரடி ‘கிரீன் சிக்னல்’… குலுங்கும் அறிவாலயம்..!!

திமுக தலைமையிலான முற்போக்கு கூட்டணியில் கடந்த ஒன்பது ஆண்டுகளாகப் பயணித்து வந்த விடுதலைச் சிறுத்தைகள் கட்சி, கடந்த 2024 மக்களவைத் தேர்தலில் 2.25 சதவீத வாக்குகள் பெற்றது. இதன் தொடர்ச்சியாக, கடந்த 2025-ஆம் ஆண்டில் இந்திய தேர்தல் ஆணையத்தால் விசிக அங்கீகரிக்கப்பட்ட மாநிலக் கட்சியாக மாறியது.

எனினும், அண்மையில் நடந்து முடிந்த 2026 சட்டமன்றத் தேர்தலில் திமுக கூட்டணி வெறும் 73 இடங்களை மட்டுமே கைப்பற்றி ஆட்சியை இழந்தது. இந்தத் தேர்தலில் விசிகவுக்கு ஒதுக்கப்பட்ட 8 தொகுதிகளில் 2 இடங்களில் மட்டுமே அக்கட்சி வெற்றி பெற்றது. இந்தச் சூழ்நிலையில், 108 தொகுதிகளைக் கைப்பற்றித் தமிழகத்தில் புதியதாக ஆட்சி அமைத்துள்ள தமிழக வெற்றிக் கழகத்திற்கு ஆதரவளிக்க விசிக முடிவு செய்தது.

ஆட்சி மாற்றத்தைத் தொடர்ந்து, தவெக தலைவர் விஜய் அமைத்துள்ள புதிய அமைச்சரவையில் விசிக-வின் இரு எம்.எல்.ஏ-க்களில் ஒருவருக்கு அமைச்சர் பதவி ஒதுக்கப்பட்டுள்ளது. விசிக மட்டுமன்றி, திமுக கூட்டணியில் இருந்து விலகிய காங்கிரஸ், சிபிஎம், சிபிஐ மற்றும் இந்தியன் யூனியன் முஸ்லிம் லீக் போன்ற கட்சிகளுக்கும் தவெக அமைச்சரவையில் இடம் கிடைத்துள்ளது. இதன் மூலம் திமுக கூட்டணியில் இருந்து முற்றிலும் விலகிய விசிக, தற்போது தவெக தலைமையிலான புதிய கூட்டணியில் அதிகாரப்பூர்வமாக ஐக்கியமாகியுள்ளது. இதனால் அதிர்ச்சியடைந்த திமுக நிர்வாகிகள் விசிக-வை நோக்கிப் பொதுவெளியில் கடுமையான விமர்சனங்களை முன்வைத்து வருகின்றனர்.

திமுக நிர்வாகிகளின் விமர்சனங்களுக்குப் பதிலடி தர வேண்டாம் என்று தொடக்கத்தில் விசிக தொண்டர்களுக்கு அக்கட்சியின் தலைவர் தொல். திருமாவளவன் சமூக வலைத்தளங்கள் மூலம் அறிவுறுத்தியிருந்தார். ஆனால், தற்போது திமுக-வுடனான கூட்டணி உறவு முற்றிலும் முடிவுக்கு வந்துவிட்டதால், விசிக வட்டாரத்தில் புதியதொரு தகவல் வலம் வருகிறது. இனிவரும் காலங்களில் பாஜக, அதிமுக ஆகிய கட்சிகளை எப்படி அரசியல் ரீதியாக விமர்சிக்கிறோமோ, அதேபோல திமுக-வையும் கடுமையாக விமர்சிக்கலாம் என்று திருமாவளவன் தனது கட்சியினருக்குப் பச்சைக்கொடி காட்டியுள்ளதாக அரசியல் வட்டாரத்தில் கூறப்படுகிறது. இதனால், திமுக நிர்வாகிகளின் விமர்சனங்களுக்குப் பொதுவெளியில் தகுந்த பதிலடி கொடுக்க விசிகவினர் தற்போது தயாராகி வருகின்றனர்.