ரசிகர்களுக்கு பேரதிர்ச்சி..! காரில் சடலமாக மீட்கப்பட்ட மல்யுத்த ஜாம்பவான் சாட்டர்லி… 40 வயதிலேயே நேர்ந்த சோகம்..!!

‘PAC’ மற்றும் ‘நெவில்’ என்ற பெயர்களில் பரவலாக அறியப்பட்ட பிரபல இங்கிலாந்து மல்யுத்த ஜாம்பவான் பெஞ்சமின் சாட்டர்லி, தனது 40 வயதில் அமெரிக்காவில் திடீரென உயிரிழந்த சம்பவம் உலகெங்கிலும் உள்ள மல்யுத்த ரசிகர்களிடையே பெரும் அதிர்ச்சியை ஏற்படுத்தியுள்ளது. கடந்த ஞாயிற்றுக்கிழமை மாலை அமெரிக்காவின் இல்லினாய்ஸ் மாகாணத்தில் உள்ள ஒரு உணவக வாகன நிறுத்துமிடத்தில், காரின் உள்ளே அவர் சுயநினைவின்றி கண்டெடுக்கப்பட்டார். உடனடியாக அவர் மருத்துவமனைக்கு கொண்டு செல்லப்பட்ட போதிலும், அவர் ஏற்கனவே இறந்துவிட்டதாக மருத்துவர்கள் அறிவித்தனர். அவர் இரத்த உறைவு அல்லது மூளை இரத்தக் குழாய் வீக்கத்தால் இறந்திருக்கலாம் என சில தகவல்கள் கூறினாலும், மரணத்திற்கான அதிகாரப்பூர்வ காரணம் இன்னும் வெளியிடப்படவில்லை.

கடந்த சனிக்கிழமை இரவு சிகாகோவில் நடைபெற்ற ‘ஆல் அவுட் பே பெர் வியூ’ என்ற மல்யுத்தப் போட்டியில் ஆண்ட்ரே எல் இடோலோவை எதிர்த்துப் போட்டியிட்ட மறுநாளே சாட்டர்லிக்கு இந்த சோகம் நேர்ந்துள்ளது. 2004-ம் ஆண்டு தனது மல்யுத்த வாழ்க்கையைத் தொடங்கிய அவர், தனது அசாதாரண சாகசங்கள் மற்றும் அபார திறமையால் உலகப் புகழ்பெற்றார். 2019-ல் ஆல் எலைட் மல்யுத்த (AEW) அமைப்பில் ஒப்பந்தமாகி பல சாம்பியன்ஷிப் பட்டங்களையும் வென்று சாதனை படைத்துள்ளார்.

சாட்டர்லியின் இந்த திடீர் மறைவுக்கு மல்யுத்த உலகம் முழுவதிலிருந்தும் சோக அலையும் அஞ்சலிகளும் குவிந்து வருகின்றன. அவர் பணியாற்றிய AEW நிறுவனம் மற்றும் அவரது சக மல்யுத்த வீரரான வில் ஆஸ்ப்ரே ஆகியோர் சமூக வலைதளங்களில் தங்களது ஆழ்ந்த இரங்கலைத் தெரிவித்துள்ளனர். மேலும், WWE அமைப்பின் தலைமை அதிகாரியான டிரிபிள் எச் தனது எக்ஸ் பக்கத்தில், “சாட்டர்லி (நெவில்) ஒரு அசாதாரண திறமையாளர், அதைவிட அன்பான மனிதர்” என்று உருகி, அவரது குடும்பத்தினருக்கும் ரசிகர்களுக்கும் தனது அஞ்சலியைப் பகிர்ந்துள்ளார்.