LATEST NEWS
“என் கல்யாணத்தை விட இதுதான் பெஸ்ட்..” விவாகரத்தை கொண்டாட்டமாக்கிய 37 வயது பெண்… ணையத்தை அதிரவைக்கும் வைரல் பதிவு..!!
தென்கொரியாவைச் சேர்ந்த பெண் ஒருவர் தனது விவாகரத்தை ஒரு பிரமாண்டமான விருந்துடன் கொண்டாடியுள்ளார். 37 வயதான கன்டென்ட் கிரியேட்டரும், தனிநபர் தாயுமான சோ சியுங்-யியோன், தனது நெருங்கிய நண்பர்களுடன் சேர்ந்து இந்த விவாகரத்து விழாவை உற்சாகமாகக் கொண்டாடியுள்ளார். தனது இன்ஸ்டாகிராம் பக்கத்தில் அவர் பகிர்ந்த இந்த வீடியோ சமூக வலைதளங்களில் வைரலாகி வருகிறது. மேலும், தனது இந்த விவாகரத்து விழா திருமணத்தை விட மிகவும் சிறப்பாக இருந்ததாக அவர் குறிப்பிட்டுள்ளார்.
இந்த விழாவில் சோ சியுங்-யியோன் பளபளப்பான உடையில் தோன்றி, தமக்கு ஆதரவாகக் கூடிவந்த நண்பர்களுடன் இணைந்து மகிழ்ந்துள்ளார். இசை, ஆரவாரங்கள், புகைப்படங்கள் மற்றும் கேக் வெட்டும் நிகழ்ச்சிகளுடன் இந்த விழா கோலாகலமாக நடைபெற்றுள்ளது. இந்த விழாவின் போது அவர் ஆற்றிய உரையும் அங்கிருந்த அனைவராலும் ரசிக்கப்பட்டது. குறிப்பாக, “உங்கள் விவாகரத்து விழா உங்கள் திருமணத்தை விட சிறப்பாக இருந்த தருணம்” என்ற வாசகத்துடன் கூடிய வீடியோ சமூக வலைதள பயனாளர்களின் கவனத்தை பெரிதும் ஈர்த்துள்ளது.
சமூகத்தில் விவாகரத்து பெற்ற பெண்களைப் பற்றிய தவறான கண்ணோட்டத்தை மாற்றுவதற்காகவே இந்த விழாவை ஏற்பாடு செய்ததாக அவர் தெரிவித்துள்ளார். திருமணத்தின் முடிவை தோல்வியாகக் கருதாமல், வாழ்க்கையின் புதிய தொடக்கமாக அவர் பார்க்கிறார். இத்தகைய தைரியமான முடிவை எடுத்து தனது மகிழ்ச்சிக்கு முன்னுரிமை அளித்த சோ சியுங்-யியோனின் செயலுக்கு இன்ஸ்டாகிராமில் பலரும் தங்களது ஆதரவையும் பாராட்டுக்களையும் தெரிவித்து வருகின்றனர்.
