“5 மாநிலங்களை உலுக்கிய ரூ.5 கோடி போலி மருந்து நெட்வொர்க்..!” மாஃபியா தலைவனை விமான நிலையத்திலேயே வளைத்து பிடித்த SIT.. பெரும் பரபரப்பு சம்பவம்..!!

பெங்களூருவை மையமாகக் கொண்டு நடைபெற்ற ரூ.5 கோடி மதிப்பிலான போலி மருந்து தயாரிப்பு மற்றும் விநியோகக் கும்பலின் முக்கியக் குற்றவாளியான பிரசாந்த் ரஞ்சன் பாபுவை, அஜர்பைஜானில் இருந்து இந்தியா திரும்பிய போது பெங்களூரு கெம்பேகவுடா சர்வதேச விமான நிலையத்தில் வைத்துச் சிறப்பு விசாரணைத் குழுவினர் இன்று கைது செய்தனர். இந்த போலி மருந்து நெட்வொர்க் அம்பலமானதை அடுத்து பிரசாந்த் அஜர்பைஜானுக்குத் தப்பி ஓடிய நிலையில், SIT கொடுத்த கடுமையான அழுத்தத்தின் காரணமாக அவர் இந்தியா திரும்பியபோது அதிகாலையிலேயே காவலில் எடுக்கப்பட்டார். இந்த கும்பல் புற்றுநோய் மற்றும் ஐசியூ போன்ற அவசரச் சிகிச்சைக்கான போலி மற்றும் காலாவதியான மருந்துகளை மறுலேபிளிங் செய்து கர்நாடகா, தமிழ்நாடு, ஹரியானா உட்பட 5 மாநிலங்களில் உள்ள 90-க்கும் மேற்பட்ட மருத்துவமனைகளுக்கு விநியோகம் செய்துள்ளது கண்டுபிடிக்கப்பட்டுள்ளது.

இந்த முறைகேடு தொடர்பாகக் கர்நாடக உணவுப் பாதுகாப்பு மற்றும் மருந்து நிர்வாக வாரியம் 16 மருந்து உரிமங்களை ரத்து செய்தும், ஃபைசர் சி&எஃப் கிடங்கு உள்ளிட்ட 8 உரிமங்களை இடைநீக்கம் செய்தும் அதிரடி நடவடிக்கை எடுத்துள்ளது. இந்த போலியான மருந்துகள் விநியோகிக்கப்பட்டதால், பாதிக்கப்பட்ட நோயாளிகளைக் கண்டறிந்து அவர்களின் ஆரோக்கியத்தைக் கண்காணிக்க சுகாதாரத் துறை தீவிரமாக முயன்று வருகிறது. மேலும், பொதுமக்கள் மருந்துகளை வாங்கும்போது அவற்றின் பேக்கேஜிங்கை கவனமாகச் சரிபார்க்குமாறும், க்யூஆர் கோடு ஸ்கேன் ஆகவில்லை என்றால் உடனடியாக மருந்து அமலாக்கத் துறை அதிகாரிகளுக்குப் புகாரளிக்குமாறும் சுகாதாரத் துறை வலுவாக அறிவுறுத்தியுள்ளது.