“தூக்கி போட்டுருங்க..” பாலில் சிலந்தி கிடந்ததை தட்டிக்கேட்டவருக்கு விற்பனையாளர் கொடுத்த ஷாக் பதில்.. அப்துல் கலாமின் உறவினருக்கு நேர்ந்த அதிர்ச்சி சம்பவம்..!!

கர்நாடக மாநிலம் பெங்களூரில் பாலின் தரம் குறித்த அதிர்ச்சியூட்டும் சம்பவம் ஒன்று வெளிச்சத்திற்கு வந்துள்ளது. அங்கு ‘நந்தினி’ பிராண்டின் அரை லிட்டர் பால் பாக்கெட்டில் இறந்த சிலந்தி ஒன்று கண்டெடுக்கப்பட்டுள்ளது. இச்சம்பவம் தொடர்பாக, முன்னாள் ஜனாதிபதி டாக்டர் ஏ.பி.ஜெ. அப்துல் கலாமின் உறவினரான நாகூர் ரோஜா, கர்நாடக பால் கூட்டமைப்பிடம் புகார் அளித்துள்ளார். அவர் இந்தச் சம்பவம் குறித்து விசாரணை நடத்தி, பொறுப்பானவர்கள் மீது தகுந்த நடவடிக்கை எடுக்க வேண்டும் என்று கோரிக்கை விடுத்துள்ளார். புகார் பெற்ற KMF அதிகாரிகள், பாலின் மாதிரியையும் பாக்கெட்டையும் பரிசோதனைக்காகக் கைப்பற்றியுள்ளனர்.

நாகூர் ரோஜா அவர்களின் கூற்றுப்படி, தீபாவளி பண்டிகையன்று ஞாயிற்றுக்கிழமை இந்தச் சம்பவம் நடந்துள்ளது. அவர் ஃபிரிட்ஜில் வைத்திருந்த நந்தினி பசு பால் அரை லிட்டர் பாக்கெட்டைத் திறந்து, பாலை காய்ச்சுவதற்காக ஒரு பாத்திரத்தில் ஊற்ற முயன்றார். அப்போது பாலில் சிறிய அளவிலான இறந்த சிலந்தி ஒன்று இருப்பதை அவர் பார்த்தார். பாலில் சிலந்தி இருப்பதைக் கண்டு அவர் அதிர்ச்சியடைந்தார். தன் குடும்பம் கடந்த இரண்டு தசாப்தங்களாக இந்த பிராண்ட் பாலை பயன்படுத்தி வருவதாகவும், நீண்ட காலமாக நந்தினி பால் மற்றும் KMF-ன் பிற தயாரிப்புகளை வாங்கி வருவதாகவும் அவர் தெரிவித்தார்.

பாலில் இறந்த சிலந்தி இருப்பதைக் கண்டறிந்ததும், நாகூர் ரோஜா உடனடியாக அதன் வீடியோவை எடுத்து பால் விற்பனையாளருக்கு அனுப்பினார். ஆனால், அந்தப் பாக்கெட்டைத் தூக்கி எறிந்துவிடுமாறு விற்பனையாளர் அறிவுறுத்தியதாகக் கூறப்படுகிறது. இருப்பினும், நாகூர் ரோஜா அதைச் செய்ய மறுத்துவிட்டு, KMF இன் அலகான மதர் டெய்ரியின் சந்தைப்படுத்தல் மேலாளருக்கு மின்னஞ்சல் மூலம் புகார் அனுப்பினார். அதன் பிறகு, KMF அதிகாரிகள் அவரது வீட்டிற்கு வந்து பரிசோதனைக்காக பாலின் மாதிரியையும் சம்பந்தப்பட்ட பாக்கெட்டையும் எடுத்துச் சென்றனர்.