18 வயது வந்தால் டிஸ்மிஸ்… போலீசிடம் மாட்டாமல் இருக்க ‘வெப் தொடர்’ பாணியில் மாஸ்டர் பிளான்… 70 சிறுவர்களைப் பகடைக் காயாக்கிய ‘க்ரைம் ஸ்கூல்’ கும்பல் தலைவன் ஜபல்பூரில் அதிரடி கைது..!!

மத்தியப் பிரதேச மாநிலம் ஜபல்பூரில், சிறுவர்களுக்குக் திருட்டுப் பயிற்சி அளித்து ரயில்களில் திருட வைத்து வந்த “திருடர்களின் பள்ளி” கும்பலை ரயில்வே பாதுகாப்புப் படை அதிரடியாகக் கண்டுபிடித்துப் பிடித்துள்ளது. இந்தக் கும்பலின் தலைவனான 40 வயதான நிதேஷ் குமார் என்பவரை RPF அதிகாரிகள் கைது செய்துள்ளனர். நிதேஷ் குமார் மீது ஏற்கனவே திருட்டு, கொள்ளை மற்றும் ஆயுதச் சட்டம் உள்ளிட்ட 15-க்கும் மேற்பட்ட குற்ற வழக்குகள் நிலுவையில் உள்ளன. இரண்டு ஆண்டுகளுக்கு முன்பு நடந்த ஒரு சாலை விபத்தில் கால் காயம் அடைந்ததால், அவனால் விரைவாக ஓடித் தப்பிக்க முடியாமல் போனது. இதனால் குற்றச் சம்பவங்கள் தொடர்பான வீடியோக்கள் மற்றும் வெப் தொடர்களைப் பார்த்து, சிறுவர்களைப் பயன்படுத்திப் போலீசிடமிருந்து தப்பிக்கும் யோசனையை அவன் உருவாக்கியுள்ளான்.

நிதேஷ் குமார், ஜபல்பூரின் மதார் டேக்ரி, ஹனுமான்தால், சித்தபாபா மலைப் பகுதி மற்றும் ரயில் நிலையத்தைச் சுற்றியுள்ள ஏழைச் குடும்பங்களைச் சேர்ந்த 12 முதல் 16 வயதுடைய 50 முதல் 70 சிறுவர்களைப் பண ஆசை காட்டித் தனது வலையில் வீழ்த்தியுள்ளான். அவனுக்கு ரயில் நிலையத்தில் 10 ஆண்டுகள் வியாபாரியாகப் பணியாற்றிய அனுபவம் இருந்ததால், ரயில்களின் நேரம், ரயில்கள் மெதுவாகச் செல்லும் பகுதிகள் மற்றும் RPF ரோந்து விவரங்களை நன்றாக அறிந்திருந்தான். இந்த அனுபவத்தைக் கொண்டு சிறுவர்களுக்கு சுமார் 2 மாதங்கள் தீவிரப் பயிற்சி அளித்துள்ளான். தூங்கும் பயணிகளின் பைகளைத் திருடுவது, கூட்டத்தில் பாக்கெட் அடிப்பது, மொபைல்களைப் பறிப்பது மற்றும் ரயில் மெதுவாகச் செல்லும்போது குதித்துத் தப்பிப்பது போன்ற பயிற்சிகளை அவர்களுக்கு அளித்து ரயில்களில் திருட விட்டுள்ளான்.

இந்தக் கும்பலின் மிகச் சாமர்த்தியமான விசித்திர விதி என்னவென்றால், எந்தவொரு சிறுவனுக்கும் 18 வயது பூர்த்தியாகிவிட்டால் அவனை உடனடியாகக் கும்பலிலிருந்து நீக்கிவிடுவான். சிறுவர்கள் கைதானால் சட்டம் கடுமையாக இருக்காது, சிறுவர் சீர்திருத்தப் பள்ளிக்கு மட்டுமே அனுப்பப்படுவார்கள் என்பதும், பெரியவர்கள் கைதானால் கடுமையான சிறைத்தண்டனை கிடைக்கும் என்பதும் அவனுக்குத் தெரியும். ஆகஸ்ட் 17 அன்று கிடைத்த இரகசியத் தகவலின் அடிப்படையில் RPF ஆய்வாளர் ராஜீவ் கரப் தலைமையிலான படையினர் நிதேஷ் குமாரைக் கைது செய்தனர். தற்போது இந்த வலையமைப்பில் சிக்கியுள்ள 50 முதல் 70 சிறுவர்களை அடையாளம் கண்டு, அவர்களைக் குற்ற உலகிலிருந்து மீட்டு மறுவாழ்வு அளிக்கும் முயற்சியிலும், திருடப்பட்ட பொருட்களை வாங்கிய பழைய பொருள் வியாபாரிகளைக் கைது செய்யும் நடவடிக்கையிலும் அதிகாரிகள் ஈடுபட்டு வருகின்றனர்.