CRIME
முகமூடி, கையுறை, ஹெல்மெட்… அத்தனை திட்டத்தையும் தவிடுபொடியாக்கிய அந்த ஒரு டாட்டூ.. கொள்ளையன் சிக்கிய பரபரப்பு பின்னணி…!!
மதுரை பைபாஸ் சாலை நேரு நகரில் உள்ள தனிஷ்க் நகைக்கடையில் கடந்த மாதம் நடைபெற்ற பெரும் கொள்ளை சம்பவம் மதுரையில் பெரும் பரபரப்பை ஏற்படுத்தியது. கடையில் விற்பனைக்காக வைக்கப்பட்டிருந்த பல லட்சம் ரூபாய் மதிப்புள்ள நகைகள் கொள்ளையடிக்கப்பட்டிருப்பது குறித்து ஊழியர்கள் அளித்த புகாரின் பேரில், எஸ்எஸ் காலனி காவல்துறையினர் உடனடியாக தீவிர விசாரணையைத் தொடங்கினர். தடயவியல் நிபுணர்கள் வரவழைக்கப்பட்டு தடயங்கள் சேகரிக்கப்பட்டதோடு, அப்பகுதியில் பதிவாகியிருந்த சிசிடிவி காட்சிகளும் தீவிரமாக ஆய்வு செய்யப்பட்டன.
காவல்துறையினர் நடத்திய சிசிடிவி விசாரணையில், கொள்ளை நடப்பதற்கு சில நாட்களுக்கு முன்பு (1 மற்றும் 2 ஆம் தேதிகளில்) தொப்பி அணிந்தவாறு ஒரு இளைஞர் கடைக்குள் இயல்பாக சுற்றி வந்துள்ளதும், அவர் கையில் கட்டுப்போட்டிருந்ததும் தெரியவந்துள்ளது. அதன் பிறகு 12 ஆம் தேதி முகமூடி மற்றும் ஹெல்மெட் அணிந்து கொண்டு பைக்கில் வந்து அவர் கொள்ளையில் ஈடுபட்டுள்ளதும் பதிவாகியுள்ளது. இந்த இரண்டு தருணங்களிலும் அந்த நபரின் கையில் இருந்த பச்சைக்குத்துதல் அடையாளத்தை வைத்து, காவல்துறையினர் அவர் யார் என்பதை வெற்றிகரமாக உறுதி செய்தனர்.
இந்தத் துப்பு துலக்கலின் அடிப்படையில், மதுரையைச் சேர்ந்த நிஷாந்த் என்பவர்தான் இந்தத் துணிகரக் கொள்ளையில் ஈடுபட்டது கண்டுபிடிக்கப்பட்டது. காதலியின் ஆசைகளை நிறைவேற்றுவதற்காக ஹாலிவுட் சினிமா பாணியில் அவர் இந்தத் திட்டத்தைத் தீட்டியிருந்தாலும், கடைக்குள் அவர் சுற்றியபோது பதிவான சிசிடிவி காட்சிகள் மற்றும் கையில் இருந்த டாட்டூ போன்ற சிறிய தடயங்கள் மூலமாக காவல்துறையினரின் வலையில் சிக்கினார். இறுதியில் தர்மபுரி சேசம்பட்டி பகுதியில் வைத்து நிஷாந்த் காவல்துறையினரால் வெற்றிகரமாகக் கைது செய்யப்பட்டார்.
