LATEST NEWS
“நம்பவே முடியல… தினமும் கனவுல வைரம் தெரிஞ்சதுங்க…” நம்பிக்கையோட மண்ணைத் தோண்டிய ஆட்டோ டிரைவர்… 15-வது நாள் கண்ணுல பட்ட ரூ.15 லட்சம் அதிர்ஷ்டம்..!!
மத்தியப் பிரதேசத்தின் பன்னாவில், தினமும் ஆட்டோ ஓட்டி குடும்பத்தைக் காப்பாற்றி வந்த சோனு ரைக்வார் என்ற ஆட்டோ ஓட்டுநருக்குக் கடந்த 10 முதல் 15 நாட்களாக இரவில் தொடர்ந்து வைரம் கிடைப்பது போன்ற கனவுகள் தோன்றியுள்ளன. தன் கனவுகளை நனவாக்க குடும்பத்தினரின் ஆலோசனையின் பேரில் வைர அலுவலகத்தில் குத்தகை எடுத்து, முதன்முறையாக ராணிபூர் பகுதியில் ஆழமற்ற சுரங்கம் அமைத்துத் தோண்டத் தொடங்கினார். அதிர்ஷ்டமும் கைகொடுக்க, வெறும் 15 நாட்களின் உழைப்பில் அவருக்கு 3.17 கேரட் எடையுள்ள விலைமதிப்பற்ற வைரம் கிடைத்துள்ளது; இதன் மதிப்பு சுமார் ரூ.15 லட்சம் எனக் கணிக்கப்பட்டுள்ளது. தேவ உத்னி ஏகாதசி நாளில் கிடைத்த இந்த வெற்றியால் சோனு மற்றும் அவரது குடும்பத்தினர் அளவில்லா மகிழ்ச்சியில் உள்ளனர்.
இந்தப் பெரிய வெற்றிக்குப் பிறகு பேசிய சோனு, வைர ஏலத்தில் கிடைக்கும் தொகையைத் தொடர்ந்து சுரங்கம் அமைக்கப் பயன்படுத்துவேன் என்றும், எதிர்காலத்தில் இதைவிடப் பெரிய வைரம் கிடைக்கும் என நம்புவதாகவும் தெரிவித்துள்ளார்; தனக்கு இப்போதும் கனவில் பெரிய வைரங்கள் தெரிவதாகவும் குறிப்பிட்டுள்ளார். தற்போது சோனு தனக்குக் கிடைத்த வைரத்தை வைர அலுவலகத்தில் ஒப்படைத்துள்ளார்.
வைர மதிப்பீட்டாளர் அனுபம் சிங்கின் கூற்றுப்படி, 3.17 கேரட் எடையுள்ள இந்த வைரம் ‘ஜெம்ஸ் குவாலிட்டி’ வகையைச் சேர்ந்தது என்றும், சந்தையில் இதற்கு நல்ல வரவேற்பு உள்ளதால் வரவிருக்கும் ஏலத்தில் சேர்க்கப்படும் என்றும் தெரிவிக்கப்பட்டுள்ளது. மேலும், வைர அலுவலகத்தில் இதுவரை மொத்தம் 175 வைரக் கற்கள் சேகரிக்கப்பட்டுள்ளதாகவும், அவற்றின் மொத்த எடை 387.21 கேரட் என்றும், அவற்றின் மதிப்பு சுமார் ரூ.3 கோடியே 1 லட்சம் என மதிப்பிடப்பட்டுள்ளதாகவும் அவர் கூறினார்.
