“இதெல்லாம் எங்களுக்கு சாதாரண விஷயமப்பா” 37 பில்லியன் டாலர் காலி.. 18 வீரர்கள் பலி.. ஆனாலும் ஈரான் போரில் கெத்து காட்டும் டிரம்ப்..!!

ஈரான் உடனான மோதல் தங்களுக்கு ஒரு ‘சின்ன விஷயம்’ மட்டுமே என்று அமெரிக்க அதிபர் டொனால்டு டிரம்ப் அதிரடியாகத் தெரிவித்துள்ளார். மத்திய கிழக்குப் பகுதியில் பல மாதங்களாகத் தொடர்ந்து நீடித்து வரும் இந்தத் தாக்குதல்களை ‘போர்’ என்று அழைக்க முடியாது என அமெரிக்கத் துணை அதிபர் ஜே.டி. வான்ஸ் அண்மையில் குறிப்பிட்டிருந்தார். வான்ஸின் இந்தக் கூற்றை ஓவல் அலுவலகத்தில் நடைபெற்ற செய்தியாளர் சந்திப்பின் போது அதிபர் டிரம்ப் முழுமையாக ஆதரித்துப் பேசியுள்ளார்.

ஈரான் மீதான அமெரிக்காவின் தாக்குதல்கள் தற்போதைய நிலையில் “அவ்வப்போது” மட்டுமே நடைபெறுவதாகக் குறிப்பிட்ட டிரம்ப், இதனை ஒரு ராணுவ மோதல் என்றுதான் அழைக்க முடியும் என விவரித்துள்ளார். அமெரிக்காவிற்கு இந்த விவகாரம் ஒரு சிறிய விஷயம் மட்டுமே என்றும், இது ஒன்றும் பெரிய காரியம் அல்ல என்றும் அவர் அந்தச் சந்திப்பில் கூறியுள்ளார். எனினும், இந்த மோதலால் அமெரிக்க வரி செலுத்துவோருக்கு 37.5 பில்லியன் டாலருக்கும் அதிகமான நிதிச் செலவு ஏற்பட்டுள்ளதுடன், 18 அமெரிக்க ராணுவ வீரர்களின் உயிரும் பறிபோயுள்ளது என்பது குறிப்பிடத்தக்கது. டிரம்ப் இதன் தீவிரத்தைக் குறைத்து மதிப்பிடும் வகையில் பேசியுள்ளது தற்பொழுது பேசுபொருளாகியுள்ளது.

நவம்பர் மாதம் நடைபெறவுள்ள அமெரிக்க நாடாளுமன்ற இடைக்காலத் தேர்தலுக்கு முன்பாக இந்த மோதல் முடிவுக்கு வருமா என்ற கேள்விக்குத் துணை அதிபர் வான்ஸ் கணிப்புகளைத் தவிர்த்துள்ளார். தற்போதைய நிலையில் அங்கு தீவிரமான துப்பாக்கிச் சண்டைகள் எதுவும் நடைபெறவில்லை என்றும் அவர் சுட்டிக்காட்டியுள்ளார். இந்த வாரத் தொடக்கத்தில் ஈரான் மீது அமெரிக்கா நடத்திய தாக்குதல்களுக்குப் பதில் நடவடிக்கையாக, வளைகுடா பிராந்தியத்தில் அமெரிக்காவின் கூட்டாளியான குவைத் மீது ஈரான் தாக்குதல் நடத்தியிருந்த சூழலில்தான் அமெரிக்கத் தலைமையின் இந்த அதிரடி கருத்துகள் வெளியாகியுள்ளன.