“இங்கிருந்தெல்லாம் கூட கோல் அடிக்க முடியுமா..?!” மெஸ்ஸி அடித்த அசாத்திய ஃப்ரீ-கிக் கோல்..! மிரண்டு போன ரசிகர்கள்..!!

இன்டர் மயாமி அணியின் கேப்டன் லியோனல் மெஸ்ஸி, கொலம்பஸ் குரூ அணிக்கு எதிரான போட்டியில் மிகவும் கடினமான, சாத்தியமில்லாத ஒரு கோணத்தில் இருந்து அற்புத ஃப்ரீ-கிக் கோல் அடித்து மீண்டும் தனது மாயாஜாலத்தைக் காட்டியுள்ளார். போட்டியின் 33-வது நிமிடத்தில், 18-யார்டு பாக்ஸிற்கும் கார்னர் கொடிக்கும் இடைப்பட்ட பகுதியில் ஃப்ரீ-கிக் வாய்ப்பு கிடைத்தது. அங்கிருந்து நேரடியாக கோல் அடிக்கும் முயற்சி என்பது சாத்தியமற்ற ஒன்றாகவே கருதப்பட்டது.

வீரர்கள் நிறைந்த பெனால்டி பகுதிக்குள் பந்தை பாஸ் செய்யாமல், மெஸ்ஸி நேரடியாக கோல் அடிக்கும் முடிவை எடுத்தார். அவர் அடித்த பந்து, கொலம்பஸ் அணியின் கோல்கீப்பர் பேட்ரிக் ஷுல்டேவின் கைகளுக்கு மேல் வளைந்து சென்று நேராக வலைக்குள் புகுந்தது. வேகம், வளைவு மற்றும் துல்லியம் ஆகியவற்றின் மிகச் சரியான கலவையாக அமைந்த இந்த ஷாட்டைத் தடுக்க கோல்கீப்பரால் முடியவில்லை. மிகக் குறைந்த இடைவெளியே இருந்தபோதிலும், மெஸ்ஸி பந்தை வலைக்குள் செலுத்த வழியைக் கண்டுபிடித்து எதிரணியின் தற்காப்பு வியூகத்தை ஆச்சரியத்தில் ஆழ்த்தினார்.

இந்த அசாத்தியமான கோல் இன்டர் மயாமி அணியை 1-1 என சமநிலைக்குக் கொண்டுவந்து, அணிக்கு பெரும் புத்துணர்ச்சியைக் கொடுத்தது. இந்தப்போட்டியில் கொலம்பஸ் குரூ அணி கூடுதல் நேரத்தில் கோல் அடித்து 2-1 என்ற கணக்கில் வெற்றி பெற்றபோதிலும், மெஸ்ஸியின் இந்த பிரமிக்க வைக்கும் கோலின் சிறப்பைக் குறைக்க முடியவில்லை. கோல் அடிக்க வாய்ப்பே இல்லை என்று தோன்றிய ஒரு கோணத்தில் இருந்து, மெஸ்ஸி தனது அபார திறமையால் மீண்டும் ஒரு வரலாற்று ஃப்ரீ-கிக் தருணத்தைப் பதிவு செய்துள்ளார்.