அய்யோ நெஞ்சே பதறுது.. வரிசையாக 6 வாகனங்களை நொறுக்கிய கொடூரம்.. போதையில் டாடா EV கார் ஓட்டுநரின் வெறித்தனம்.. நெஞ்சை உலுக்கும் சிசிடிவி வீடியோ..!!

பஞ்சாப் மாநிலம் லூதியானாவின் முதன்மையான பகதூர்கே சாலையில் அதிவேகமாக வந்த டாடா டியாகோ இவி கார் ஒன்று கட்டுப்பாட்டை இழந்து, அடுத்தடுத்து ஆறு வாகனங்கள் மீது பயங்கரமாக மோதி விபத்தை ஏற்படுத்தியுள்ளது. இந்த அதிர்ச்சியூட்டும் விபத்தின் ஒட்டுமொத்த காட்சியும் அங்கிருந்த சிசிடிவி கேமராவில் பதிவாகி, தற்போது சமூக வலைத்தளங்களில் தீயாகப் பரவி வருகிறது. அந்த சிசிடிவி காட்சியில், வேகமாக வரும் கார் எதிரே வந்த சைக்கிள், மோட்டார் சைக்கிள், ஆக்டிவா ஸ்கூட்டர் மற்றும் இரண்டு இ-ரிக்ஷாக்கள் மீது ஒன்றன் பின் ஒன்றாக மோதுவது தெளிவாகத் தெரிகிறது. காரின் அதிவேக மோதலின் தாக்கத்தால், மோட்டார் சைக்கிளில் வந்த நபர் காற்றில் பல அடி உயரத்திற்குத் தூக்கி வீசப்பட்டு, சாலையில் விழுந்துள்ளார். விபத்தில் சிக்கிய மோட்டார் சைக்கிள் முற்றிலும் சேதமடைந்ததுடன், ஒரு இ-ரிக்ஷாவும் சாலையில் தலைகீழாகக் கவிழ்ந்தது.

இந்தக் கொடூரமான சங்கிலித் தொடர் விபத்தில் ஐந்து பேர் படுகாயமடைந்தனர். அவர்கள் அனைவரும் உடனடியாக மீட்கப்பட்டு, லூதியானா சிவில் மருத்துவமனைக்குச் சிகிச்சைக்காக அனுமதிக்கப்பட்டுள்ளனர். காயமடைந்தவர்களில் ஒருவருக்குத் தலையில் பலத்த காயமும், எலும்பு முறிவும் ஏற்பட்டுள்ளதாகத் தகவல்கள் தெரிவிக்கின்றன. முதற்கட்ட விசாரணையின்படி, விபத்தை ஏற்படுத்திய கார் ஓட்டுநர் மது போதையில் இருந்திருக்கலாம் என்று சந்தேகிக்கப்படுகிறது. விபத்து நடந்தவுடன் தப்பியோட முயன்ற ஓட்டுநரை அங்கிருந்த பொதுமக்கள் துரத்திப் பிடித்து, சலீம் தப்ரி காவல் நிலைய போலீசாரிடம் ஒப்படைத்தனர். தற்போது ஓட்டுநரைக் காவலில் எடுத்துள்ள போலீசார், விபத்து நடந்தபோது அவரது உண்மையான நிலை என்ன என்பது குறித்தும், விபத்திற்கான முழுமையான பின்னணி குறித்தும் தீவிர விசாரணை மேற்கொண்டு வருகின்றனர்.